قصة و حكمة من زياد الصوفي.. 59

القصة:

هكذا تقتل النساء بسوريا

من أشد الأخطار من وجهة نظرو و قلة عقلو لحافظ الأسد على الأمن القومي السوري بالتسعينات كان الديش ( صحن التلفزيون)..

نحنا كنا باللادقية شوي محظوظين عن غيرنا على اعتبار أنها مدينة ساحلية و نقدر نشوف المحطات اللبنانية و التركية و المحطات اليونانية اللي بالي بالكون لمجرد تركيب أنتين عادي..

اشتد الضغط على القيادة العليا من ناحية الانفتاح الإعلامي الموجه، فما كان من حافظ الأسد إلا وافق بالنهاية بعد عمر طويل على تركيب الصحون، اللي بالمناسبة كان يكلف ثروة تركيبو هديك الأيام..

أبو حنا كان من أوائل الشباب اللي لقطو هالمكرمة الأسدية و طلع على بيروت ليتعلم تركيب الصحون اللاقطة..

فاق أبو جميل على هالموضوع و صرخ لكلابو:

جيبولي واحد يركبلنا هالصحن…

أبو حنا مالك غيرو يا معلم..

بيطيرو على بيتو بالعوينة و بيجيبوه موجودا الساعة 11 بالليل..

قوم المعلم بدو ياك..

أبو حنا ألو تم ياكول و ما ألو تم يحكي، بيحمل حالو و بيروح ليشوف مين هالمعلم اللي بدو ياه، و شو بدو هالمعلم منو…

بيوصلو على بيتو للمعلم.. أبو جميل سكران و قاعد عالتلفزيون: هنت بتعرف تركب صحن للتلفزيون؟؟

-ايه سيدنا بعرف..

ايه يللا لكت ركبو..

– تكرم عينك يا ملعم بكرة الصبح بجيب كلشي لازم و بركبلك ياه…

شو ماتقول؟؟ و أنا لبكرة على شو بدي اتفرج !! عجماللللللك؟؟؟؟ ايه روح انقبر جيب عدتك و ركبو هلق..

الساعة صارت وحدة بالليل و أبو حنا معربش على سطوح أبو جميل بعز البرد عم يركبلو الديش..

ما خلصت ولك جحش؟؟

– ايه مبالا سيدي صار جاهر خلص..

ايه اقعود لكت علمني عليه تشوفك…

معروف عن أبو جميل الفطنة و سرعة التعلم بما أنها صفة عامة جينية بهالعيلة النسة..

طلع الضو و أبو حنا عم يعلمو لأبو جميل كيف يشغل و يطفي التلفزيون..

خلص روحو انقلعو كلكن من هون و اتركوني..

أبو حنا اعتقد أنو إجا الفرج و خلص راجع عند مرتو و بنتو، بس الفدادين اللي عند فواز كان الهون رأي تاني ..

المعلم ما قال روح عالبيت، باتضل هون لحتى يقلك روح..

تلات أيام كاملة أبو حنا قاعد بالمطبخ ببيت فواز ناطر يعطيه إذن الصرف، كل شوي يعيطلو:

ولك بو حنا تعاااا، كيف بدي حط الجزيرة.. يا بو حنا تعاااا كيف بدي شوف السيغما.. يا بو سخام تعااااا رجعلي عالمباراة..

تلات أيام كاملة و أبو حنا مقيم عم يشتغل ريموت كونترول عند أبو جميل..

إجا الفرج باليوم الرابع..

برابو عنك يا بوحنا ، قديش حسابنا..

– ما بدنا سيدي إلا بركتكون..

و الله بيشيل أبو جميل 50 ألف ليرة بهديك الأيام و بيعطيها للمعلم أبو حنا..

المسكين ما بيعرف سوف كان ناطرو..

شهر كامل و أبو حنا بالليل جاهز بكامل عدتو و ما شالح تيابو بانتظار فدادين المعلم ليجو ياخدوه..

كل يوم على هالحالة..

بعد شهر من تركيب الديش، بيطلبو فواز لأبو حنا بنص الليل.. على حكيو لأبو حنا كان فواز جانن و معصب و ما عارف بمين بدو يفش خلقو..

ولك حيوان بتجيب المصاري اللي عطيتك ياها و بتجي معك ربع ساعة..

أبو حنا بعد شهر من القبض كان صارف هالمصاري و معمر غرفة و صالون بالضيعة..

بس يا سيدي أصرفت المصاري و ما معي رجعلك..

بيقوم من كرسيتو أبو جميل و بيقرطو كف لأبو حنا بيموتو فيه..

كل يوم يا حيوان بيمر بدون ما ترجعلي المصاري، رح زيدهون عليك 5000 ليرة.. يللا روح انقلع دبر راسك..

هالمسكين ما كان منو إلا راح على كنيستو و حكالو للمطران اللي صار، لحتى انعملو لمة بكنيسة مار مخاييل تحت اسم تبرع لإنقاذ مسكين..

الحكمة:

يا مركب التلفزيون عند أبو جميل بألوانو، بيروح المال و التعب و التلفزيون و بتشوف الله بألوانو..