قصة و حكمة من زياد الصوفي.. 41

 القصة:

حكاية اليوم صارت بصيف 1998 مع أخ الي اهلو بيصيفوكل سنة بضيعة دورين صوب سلمى على جبل الاكراد .. خلص ابو الزوز فحوصات السنة التالتة طب و اتصلت فيه والدتو: يا ابو الزوز جيب بنت اختك الصغيرة و اطلعو عالضيعة ناطرينكون..

كراج اللادقية- سلمى مليان عطلوع الموظفين, و ابو الزوز مع هالصغيرة بشوبات اللادقية ناطر باص دورين ليوصل..

بيوصل الباص و بيركضو هالبشر ليلحقو كرسي, ابو الزوزبيلاقي كرسي ورا الشوفيربيحط هالصغيرة بحضنو و بيمسح عرقو و عرقها و هوة عم يقول بألبو, نشكر الله اتهونت..

ثواني قبل ما يمشي الباص, بيمد راسو شب من الباب و بيقلو: خود هالصغيرة و فضيلي هالمحل فورا..

ليش يا معلم, اجيت قبلك و هالصغيرة ما فيني نزلها بهالشوب بقا..

عم قلك انزال فورا, انا من مفرزة امن دورين و هالمقعد مخصص النا..

ايه يا سيدي ماني نازل تكون رئيس المفرزة, اجيت قبلك و رح ضل قاعد هون..

بين هالخربطة اللي صارت و تفادياً لمشكلة كبيرة, بيقوم و احد من صوب الشوفير بيقلو لعنصر الامن: اتفضل خود محلي و انا بانتظر الباص التاني..

ايه ماشي, بس انا بفرجيك يا حيوان بس نوصل عالضيعة..

كل الطريق و ابو الزوز قلقان من وصلتو لفوق و هالكلب كل الطريق عم يدير وجهو و يذكرو انو بيفرجيه بس يوصل عالضيعة..

كرزات و حصرمات دورين بينو, و الباص قرب يوصل لاخر نقطة الو..

بينزل هالكلب من الباص و بيقلو للشوفير: خليه لهالكلب معك ثواني و انا جاية.. و يا ويلك اذا بيترك الباص و بيهرب..

بالفعل ما كذب خبر, و ثواني كان معو ست كلاب من العيلة نفسها عم يشحطوه للدكتور من الباص و هالصغيرة بأيد الشوفير عم تتفرج على خالها عم ياكول قتل قدام كلشي في بشر..

لما بقلك يا ابن الكلب بتعطيني محلك, أبتناقش المرة الجاية, فهمان؟؟؟

الضيعة التمت كلها عم يتفرجو عالدكتور عم يتبهدل من القتل و من المسبات وكيف هالكلاب عم يشحطوه عالمفرزة.. شوي و بيجي واحد سابع بيقلو بدون ما حدا يسمعو: انت من وين يا حبيب؟؟

من الصليبة..

و انا من الطابيات اسمي مازن تلو, ما تاكول هم شوي و انا بزبطلك الموضوع

ثواني و بيجي المساعد رئيس المفرزة, من وين بتعرفو لمازن تلو؟؟

صاحبي

التلو آدمي, بتعرف لولا اتوسطلك, و اللي خلقك أبتطلع من هون عايش يا حيوان..

و بالفعل بيطلع الحكيم عايش من المفرزة عم يدور وين بنت اختو صارت

اتذكرت هالحكاية من كم يوم لما اسمعت انو في نقيب من بيت ميرزا انشق و التحق بالجيش الحر عجبل الاكراد و فجر مفرزة دورين باللي فيها و استشهد ليلتها.. الله يحميك يا ابو الزوز, و مبروك اللي انكتبلك يا سيادة النقيب 

الحكمة:

بين سلمى و ضيعة دورين.. رجال الحر منتشرين

ضب كلابك و رجعهون.. على مشقيتا و عسقوبين