قصة و حكمة من زياد الصوفي.. 2-3

الجزء الثاني.. الحلقة ( 3 ) :

القصة:

بكل مدينة بسوريا , في حارة أو اكتر بيشكلو مصدر ازعاج لنظام الاسد .. حارات بيعتبرها النظام قنابل موقوتة بتنفجر بأي لحظة , لهالسبب و لغيرو، حاول النظام يخترق هالحواري بشوية انتهازيين و مخبرين و مروجين للحشيش , لحتى يضل مسيطر على قرارها و ردات فعلها..

حارة الصليبة باللادقية مانها الحارة الوحيدة باللادقية اللي مشكلة عقدة عند النظام , في حواري متلها كتير, بس الصليبة تحديداً نتيجة تركيبتها السكانية و لرجولة شبابها الزايدة عن العادة ، الشباب اللي أثبتو بكل محنة مرّت بهالبلد أنهون حاضرين بردات فعلهون , و اللي عالأغلب بتكون مبنية عالعواطف و بدون حساب لأي تداعيات..

حكاية اليوم رح اتفش خلقنا شوي..

بنص التسعينات و أثناء خروج الطلاب من مدارسهون , شباب من هالحارة الصامدة واقفين عند مفرق العلبي , ناطرين صرفة بنات مدرسة ماهر درويش أحمد..

و عند طلعة الصبايا من المدارس , بيسمعو هالشباب صوت صراخ غير عادي جاية من نزلة حلويات الهنا ( نزلة بناية البطة ) ..

بيتركو عشقهون و غرامهون , و بيركضو على مصدر الصراخ..

سيارة أيهم الاسد الرانج الروفر واقفة بنص الطريق, و معها سيارة مرافقة ميرسيدس مليانة شبيحة..

و بالصورة نفسها ، شب من بيت التبسة, راكب على موتور هارلي , قاطع الطريق و عم يصرخ و يهدد الأيهم انو ينزل من سيارتو..

ليش هيك عمل ابن التبسة, كل ولاد الحارة صارو يسألو؟؟؟

وصل الجواب فورا , أنو ايهم قبل بكم يوم, مسلبط على موتور لواحد من اصحاب ابن التبسة و ما مرجعلو هوة..

بدل ما ينزل أيهم من السيارة , و على عادة الجبن بهيك حالات, بيأمر مرافقتو هنن اللي ينزلو و يربوه لهالولد اللي اتطاول على أسيادو..

باللحظة اللي بينزلو المرافقة من سياراتهون, بيفتح جاكيتو ابن التبسة و بيظهرلو لأيهم حزام ناسف لافف فيه جسمو..

أهل الحارة واقفين عم يشوفو هالابضاي شو عم يعمل, و ناطرين بأي لحظة يفجر التبسة حالو بالاسد و بكلابو..

رجّع كلابك عالسيارة و انزل انت يا جبان , احسن ما فجر حالي بالكل..

لما بيشوف هالمنظر أيهم و بيسمع تهديدو للشب, بيصرخ بكلابو يرجعو عالسيارة و بينزل هوّة..

بيمسك فيه التبسة و بيلعن أمو على أبوه من القتل, كف ياخدو و لبطة اتجيبو , و كل ما حاول حدا من الشبيحة يقرب ليخلص معلمهون, كان التبسة يمسك بالصاعق و يهدد بالتفجير..

ربع ساعة كاملة و الأيهم عم ياكول قتل, و أهل الحارة عم يتفرجو و يشمتو , و الشبيحة عم يشوفو معلمهون ابن عم ربهون عم ياكول القتلة و ما قادرين يعملو شي..

بيركب بموتورو التبسة و بيترك اللأيهم عالارض عم يدمي, و بيطلع بالموتور بيترك الحارة..

بيترك الأيهم الحارة مع صراخو و وعيدو بالانتقام من أهاليها , و بيغيبو ساعة و بترجع الدولة بكل أفرعها عالحارة.. بيوصلو عقهوة الشريتح , بيمسكو شب من بيت الدعبول و بيصيرو يضربوه ليدلهون عابن التبسة , بس هالشي ما صار..

بيروحو عند أبوه اللي بيصلح موتورات و المفاجأة لما بيسألوه عن ابنو بيقلهون : ما شفتو من تلات سنين و عالأغلب هوّة ببيروت..

الحارة ضليت يومها مليانة بالامن و الشبيحة بانتظار رجعتو لهالابضاي, بس ما قدرو يوصلو لشي..

تلات ايام بعد هالقصة, كان التبسة بشارع بورسعيد عم يكزدر بالهارلي شي ربع ساعة و بعدين اختفى و ما عاد اسمعنا عنّو شي..

بالمناسبة : الحزام الناسف كان شوية ديناميت لصيد السمك مو اكتر من هيك ، بس الشبيحة و بيت الاسد ما في أجبن منهون لمّا بيوقعو بهيك مواقف..

الحكمة:

عملتا تحتك يا عين أمّك من كم أصبع صيد سمك..

اتحفّض منيح المرة الجاية، الحر رح يجي يفسخلك هالحنك..