قصة و حكمة من زياد الصوفي.. 116

القصة:

الكل بيتذكر فينا فيديو قرية البيضا ببداية الثورة.. الفيديو اللي اتسرب و اللي أنا باعتقادي كان بمثابة الفيديو اللي نقل عدوى الثورة لباقي المدن و الارياف السورية..

ما حدا فينا بينسى شجاعة هالبطل البياسي اللي وقف بنص ساحة البيضا تاني نهار بعد ما اعلام النظام كذب هالمقطع, و أثبت للعالم كلو أنو الناس اللي كانو عم يتدعوسو هنن من سوريا و هالمدينة هية بانياس مو مكان ما بشمال العراق متل ما ادعى النظام..

اللي ما بيعرف أهل بانياس أنا رح خبركون عنهون..

اطيب شعب بالدنيا كلها, و بدون مجاملة بقلكون عن اهل هالمدينة, اذا بتطلوب عيونهون بيعطوك ياهون بس اطلوب بالزوء و اللطف, و يا ويلو اللي بيدعسلهون على طرف, لأنو موضوع الكرامة عند اهل هالبلد ما شفت متلو بعمري كلو..

حكاية اليوم من بانياس الأبية..

بانياس اللي ما هية ضيعة و لا هية مدينة.. بقعة جميلة على شط اللادقية, ما فيك ما يلتفت نظرك الها أثناء مرورك فيها عطريق اللادقية الشام..

قصة اليوم صارت احداثها بنص التسعينات, لما بيت الاسد وزعو المناطق على بعضهون و اتقاسمو حصص محافظة اللادقية , فكان لتوفيق الاسد مدينة بانياس..

توفيق الاسد أحد ابناء عموم البائد الخالد, و نتيجة حالة الجهل اللي عايشها, حيث بالكاد بيقدر يفك الخط, ما قدر يمارس الدور التشبيحي اللي اتوكل فيه, و قضاها بشوية تهريب سلاح و مواد استهلاكية و دخان, مستفيد من احتكار سوق التهريب بمدينة بانياس و ضيعها..

من بين الأشياء اللي انتصح فيها بعد ما شاف أنو ما عم يمشي الحال بالتهريب بس, قرر أنو يفرض أتاوة عشر ليرات على كل سرفيس بيغادر كراج بانياس..

و وكل لهالمهمة مجموعة من الشبيحة اللي ما بيفوقهون بالذكاء بشي و لا بيتميز بشي عنهون الا بهالكنية اللي حاملها..

استغربو شوفيرية السرافيس يومها لهالقرار, و الكل بدي بالسر يتأفف بكل مرة بيمد ايدو على جيبتو و بيناولو للشبيح الواقف على باب الكراج عشر ليرات..

كل كم يوم يمر توفيق الاسد بسيارتو المرسيدس السودا عالكراج منشان يضل فارض هيبتو و لمعرفتو بأهل بانياس أنو ما بيتأمنلهون لما حدا بيقرب على كرامتهون و رزقهون..

بصيف ال 95 , بيجتمعو شلة شوفيرية من المرقب و البيضا و بيقررو انو ما بقا يدفعو هالاتاوة, و أنو ولادهون أبدى بهالعشر ليرات سعر ربطة خبز..

و قرروا انو اعتبارا من بكرة ما بقا رح يدخلو جوا الكراج و رح يضلو واقفين برا و يلمو ركابهون لحتى يوقفو ظاهرة الاتاوة بالكراج و يخلو الشوفيرية تاعون الضيع التانية يتمردو متلهون على توفيق الاسد..

استغربو الشبيحة أنو كيف باصات البيضا و المرقب ما دخلو اليوم عالكراج, فلما مشيو لبرا الكراج شوي ليشوفو شو عم يصير و يكتشفو انو شوفيرية هالضيعتين واقفين برا و عم يلمو ركابهون , بيجنو و بيصيرو ينبحو منل الكلاب : 

و لك عرصات هنتو ليش مانكن جوا الكراج؟؟

و ما حدا من الشباب عم يرد عليهون متل ما اتفقو بين بعضهون..

ولك بدكن تدفعو العشر ورقات غصبا عنكن ..

لما بيشوفو الشبيحة أنو ما في خواص مع الشباب, و انهون اكتر منهون بكتير, بيروح زعيمهون احمد الصالح و بيطلع لعندو لتوفيق الاسد و بيخبرو:

شوفيرية البيضا و المرقب يا سيدي اتمردو و أبقا عم يدفعو العشر ورقات و صارو ما يلمو ركابهن من برا بالجكر فينا..

بيطير صوابو توفيق الاسد و بيأمر شبيحتو يجيبو سلاحهون و يمشو وراه للكراج لحتى يأدب بانياس كلها بشلة هالشوفيرية..

لما انتشرالخبر بين الشوفيرية أنو توفيق الاسد جاية بنفسو لحتى يربي بانياس بشوفيريتها, قررو ما حدا يشتغل يومها و الكل يبقى ناطرو لهالكلب بالكراج ليشوفو شو رح يعمول..

بيوصل توفيق و معو عشر كلاب من شبيحتو و هنن حاملين بواريدهون و بيدخلو عالكراج قدام كلشي فيه شوفيرية و بيبدا يصرخ توفيق الاسد:

الكل يجي يقرب لهون.. و الله تأجعل الله ما خلقكن يا عرصات.. 

هنتو يا كلاب بدكن تعصولي كلامي؟؟

لما بقول رح تدفعو هالمبلغ يعني رح تدفعوه غصبا عن ربكن..

هون لما بدي هالكلب يكفر و يسب على أعراض الشباب, بيقرب شوفير من البيضا الله يذكرو بالخير الحاج عبد المنعم مرتضى و بيلصقو كف لتوفيق الاسد قدام كل كلاب جهنم اللي معو و بيوقعو عالارض..

بهاللحظة كلشي في شوفيرية بالكراج بيشتبكو بالشبيحة و بيخلصوهون سلاحهون و بيضل هالبطل عبد المنعم فوق توفيق الاسد عم يضربو لحد ما أغمى عليه..

خلال عشر دقايق تماما, الكلب اللي كان مفكر حالو اسد كان مغمى عالارض..

و عشر شبيحة ما مبين لون وجهون من الدم اللي عم يجري و هنن مربطين بالجنازير..

و شباب البيضا و المرقب عم ينفضو تيابهون و بايدهون عشر بواريد اغتنموها من هالمعركة..

بتوصل الحكاية عالشام..

انو شباب بانياس محتجزين توفيق الاسد و معو عشرة كلاب من شبيحتو..

و لمعرفة القيادة الحكيمة بالشام أنو ما بينلعب مع أهل بانياس ، فقرروا انو يلفلفو الموضوع و ينهوه بشكل سلمي…

بتجي الاوامر لعبد الحليم خدام لحتى يتدخل بفك توفيق و جماعتو, مقابل تعهد هالكلب أنو ما بقا يقرب عالكراج..

الحكمة:

من اللادقية لبانياس..

عيلة الاسد رح تنداس…زياد الصوفي – مفكر حر؟

About زياد الصوفي

كاتب سوري من اللاذقية يحكي قصص المآسي التي جرت في عهد عائلة الأسد باللاذقية وفضائحهم
This entry was posted in الأدب والفن, ربيع سوريا. Bookmark the permalink.

Leave a Reply