قبل اقل من شهروأنا إمروح من عمان على إربد اسمعت صوت(طقه) بالسياره وبالذات في الجهه اليمين من السياره, ويا ريتني ما اسمعته, حططني اللي فوقي واللي تحتي.
ثاني يوم الصبح ظليت رايح بوجهي على اقرب محل ميكانيكي, شرحتله السبب وقال مشكلتك بسيطه هاظا أكس اليمين, خلينا انغيرلك راسية الأكس, قلت: اوكي بس يعني بتروح الطقه؟ وقديش بتكلفني عشان انا مصرياتي على قدي..قال: أوف!!! لعاد شو أنا شغلتي, بعد قليل بدأ بالتفكيك والتغيير وقال يلله سوقها, اطلعت على شان اجربها أنا وإياه, بس الصوت ظله موجود وما راحش, قال: اسمع امشي عليها من هون لبكره وإذا ما ضبطتش معاك بترجع عالمحل نغيرلك الأكس كله, قلتله: طيب ليش من أول ما غيرناش الأكس كله؟ الأكس كله أرخص من راسية الأكس وحدها…
بعد 3 أيام رجعت عليه والمشكلة ما زالت قائمة, فقام بتغيير الأكس كله, ولكن الصوت لم يختفي من السياره, ازهقت منه ورحت على ميكانيكي ثاني, قلي بعد ما ساقها مين قلك الأكس اليمين؟ قلتله: الميكانيكي اللي على الإشاره الأولى, قال-عمي-..اسمعني: هاظا الميكانيكي تبعك شكله ما بفهمش, هاظا المشكله عندك بالأكس اليسار, بس أنت بتهيألك انه الصوت بالاتجاه اليمين, قلت: شو يعني بدي أرد أغير الأكس اليسار؟ وصرت أضرب على راسي وأشد بشعري وأعد بالمصاري لفراطه اللي معي ورجعت على الدار وأخذت من زوجتي المصاري اللي وفرناهن لفاتورة الكهربه,وبس دخلت بسيارتي على كراجه وصفيتها قال: صدقني هذي هي مشكلتك وقام على الفور بتغيير الأكس اليسار, وبعد ما روحت فيها كان الصوت ما زال قائم ومتواجد بكثرة ومتوفر بكميات هائلة.
حكيت عن الموضوع قدام الناس وقلتلهم: ليش الحكومه لما الواحد يجي يفتح صالون حلاقه بطلبه منه شهادة اكاديمية من مركز أكاديمي تشهد بأنه حلاق متدرب بشكل جيد!!! وليش لما أي واحد يفتح محل ميكانيكي ما بطلبوش منه هذي الشهاده؟ كلهم معهمش خبره وكلهم بتحزروا تحزير, يعني أنا بإمكاني أن أفتح كراج ميكانيكي سيارات وأفتحه من الصبح وأكتب عليه (تخصص كوري ) أو (تخصص ألماني) وأي واحد بيجي عندي بصير أتحزرله تحزير.
صاروا يضحكوا و صاروا كلهم ميكانيكيه وكهربجيه وفحيصة سيارات وأشاروا عليّ بخرط البلاطات وما ضبطتش معنا, ثم اشترينا بلاطات جديدة مع إبريكات جديدة وبرضه كمان ما ضبطتش معنا.. واقتنعت أخيرابكلام غيرهم من الناس وهو لازم آخذها على ميزان استيرنغ, وفعلن ما كذبتش خبر وهب شفطت بسرعه على أول ميزان سيرنغ وشرحتله الوضع, قام الخبير بفحص السياره وقلي مين قلك غيّر الأكس؟ قلتله: فلان وفلان وعلنتان وطويل الأذان والميكانيكي فلان و..و…و.. قال: اسمع يا ابو الشباب: هظول اللي رحت عليهم عليّ الطلاق من مرتي ما بفهموش وكلهم حمير..مشكلتك عمود الشيال مش الأكس.
-عمود الشيال!!.
-أه,نعم.
قلتله طيب غيره, غيرلي عامود الشيال وروحت فيها على الدار بس فعلا راح الصوت ولكن بقي هنالك صوتا أسمعه بعد التقويمه على الغيار الثاني وهو صوت (دَبه) كبيره بشعر فيها تحت أرجلي.
حكيت تلفون مع صديق لي عنده قطع غيار كوري وقلي: تعال عالمدينه بخلي جاري يشوفلك اياها عنده كراج وهاظا شاطر اكثير, رحت بعد اسبوع عليه والصوت ما زال ظاهرا, حكالي الميكانيكي جاره: يا حجي مشكلتك لا هي بالأكس اليمين ولا بالشمال ولا بعمود الشيال: عندها صعقت وضربت على رأسي بيدي وهي مضمومة الأصابع, قلت: صدقني صرت دافع اكثر من 150 ليره عليها والصوت مش منها؟؟؟؟لعاد من شو يا معلم؟ قال: بالطلاق من نسوان الميكانيكيه كلهم مشكلتك واضحه وهي الكفااااات, وقال:(الكفات) ومد حرف الألف وهو على ثقة من كلامه ثم أشعل سيجارته الطويلة واتكأ على طبون السياره, قلتله ماشي غير الكفات, رفع السياره ومعها رفعلي السُكري والضغط وبلش يفك ويرمي براغي يمين وشمال ولما طال الكفات قال على اذنك بدي اروح اجيبلك كفات(دايو نوبرا2) من نفس نوع السياره, وأنا قعدتله بالمحل مثل الناطور -وتركت الكتابة والثقافة لمدة اسبوع- وبعد ساعه جاء وهو يصفر ويقول: ما فيش كفات لسياراتك, قلتله: يا سلام وليش حضرتك تفكهن لعاد!! قال: في حل….خلينا نشتري بوكسات ليهن ونروح نكبسهن بالمخرطة, قلت:” أمرك على راسي, ورحنا اشترينا بوكسات وفك وشيل وجيب وحط وبهدله حتى صار الوقت قريب المغرب وأوشكت الشمس على تغيير لونها كما أوشكت الأفاعي على تغيير جلدها, وبعد جهد جهيد ركبنا الكفّات, وقبل ما اشغل السياره ارتكبت أنا خطأ تاريخي وهو:
-اسمع يا معلم, قبل مده ركبت ماتور للسياره بدل الماتور اللي كشنت وتكربس محله, ولما الميكانيكي ركبه كسرلي (ماب سونسر) وهو منظم ضغط الهواء في (مينوفولت الهواء) أي ما يسمونه ب(الثلاجه) وهو عندي شغال ولكنه كما ترى, مثل ما انت شايف معلق تعليق ومُجبّر تجبير مثل اليد المكسورة والممدودة إلى الله, قال: هذي بسيطه راح جاب ماب سونسر جديد وركبناه ودفعنا حقه وربنا اعلم من وين دبرنا حقه..وروحنا بالسياره وهي عال العال, ثاني يوم صارت السياره اتقطع, يعني صار فيها تقطيعه, بعدين صارت تطفي وانا ماشي فيها ومشغلها, بعدين رجع الصوت زي أول, بدكوا الصحيح اقرفت حالي, التصلت بصاحب محل القطع والميكانيكي, قالوا تعال جيبها هون في واحد شاطر عنده كمبيوتر لفحص السياره.
ثاني يوم سريت من الصبح بدري عااااااااااااان …عااااااااااااان وأنا بشد على السياره والسياره مش قابله تمشي… ولما رحنا عالكمبيوتر كَبْ على مينوفولت الهواء ماء وقال: فورا روح غيره هاظا مخزوق, عندها صرت أروح وآجي من أول الشارع لآخره ومن آخره لأوله وأنا أفرفك بأصابع يدي وأقول: ول ول ول الماتور ماهو أصلا جديد كيف صار المينوفولت فيه مخزوق؟؟؟؟؟ والله بعده بورقته, بعدين قلت إلحق العيان لباب الدار, اتصلت بصديقي واستدنت منه مبلغ 500 دينار ووقعت له على شيك بالمبلغ وصرفته كله على السياره, وقلت: يلله يا ولد محل ما بقلك صاحب الحمار اربطه لازم تربطه, وغيرت المينوفولت وما زالت السياره تقوم بإطفاء المحرك وهو شغال,شغله حيرتني, المشكله مش بالتصليح المشكله بالتحزير, ما حدش بفهم خالص…نهائيا, كل واحد بطعن بالثاني وكلهم مثل الأطباء كل واحد بعطيك تشخيص جديد مختلف عن الآخر..يعني معناته أي واحد بعرف يمسك المفك والمفتاح بقدر يصير ميكانيكي ويحلف على مرته بالطلاق… روحت على الدار وقعدت بالقرنه بالزاوية وصرت أبكي وأعيط على حالي: ول ليش يصير بي هيك؟؟بعدين السياره مش لي..السياره معي أمانه حتى يعود صاحبها,شو بدي احكيله؟؟ والنتيجة النهائية: لا تشتروا من عربي ولا تبيعوا عربي ولا إتصلحوا سياراتكوا عند عربي… وصدقوني لو كنت انا المريض ما بحطش على حالي كل هذي المصاري أو حتى لو كان واحد من أهل الدار مريض ما بنحط عليه كل هذي المصاري, أي صدقوني مره طاحونتي اوجعتني وظلت توجعني شهرين حتى سقطت وحدها أثناء تناول الطعام وبلعتها مع الأكل ولم اعلم بها الا بعد أن تجاوزت سقف حلقي.
ثاني يوم يئست منها وقررت ابلغ صاحبها باليئس منها وإنه لازم يبيعها وقبل أن أفعل فعلتي اتصل بي قريب لي وقال: ابو علي انت ليش تروح على ميكانيكيه همل, تعال لهون عندي واحد متخصص جير توماتيك..أكيد يا رجل مشكلتك بالجير, رحت عليه والسياره على طول الطريق اطفأت المحرك 10 مرات وقعدت ساعه حتى وصلت علما أن الوقت الحقيقي للوصول هو 5 دقائق, وبطلت اروح هظاك الأسبوع على الدار صرت أداوم مع المدينه الصناعية وأروح معاهم وأحيانا ما أروحش إلا بعد أن أتأكد أن كل الكراجات أقفلت أبوابها وأطفأت أنوارها لمدة اسبوع بالكامل حطيت فيهن اللي فوقي واللي تحتي وصرت مديون بألف دينار أردني, وصلت إلى ميكانيكي جير التوماتيك, وبعد الفحص قال: سيارتك حتى تستمر وما يطفيش المحرك بدها مخ جير …وبده جيرها جدلة كهربه جديده عشان في كمان عندك مشاكل على جدلة الكهربه,رفع السياره على الجك ونام تحتها: قلتله حط تحتها داعه عشان ما تقعش عليك!!! قال: شو مالك إنت مش مؤمن؟ أنا متوكل على الله, عندها سكتت وقلت : والنعم بالله, ثم عاود يقول: والأفضل تشتري جير كامل عشانه تصليحه بكلفك اكثر من حق جير.
غيرنا الجير وبقي المحرك يتوقف عن التشغيل فجأة لوحده, اتصلت بكهربائي هذي المره الوحيده اللي طلع الكهربائي فيها ابن حلال: قال جيبها عندي سيارتك بدها (ماب سونسر) تاع سيارة (أوبل فكترا), رحت لعنده وركبناه وضبطت السياره , يعني كانت مشكلتنا بالماب, ولو بقينا على الماب سونسر القديم كان أفضل لنا من تغييره بآخر خربان حططنا اللي فوقنا واللي تحتنا, اذا بدك تروح على ميكانيكيه لا تروحش إلا وأنت عارف شو مشكلتك قبل ما يتحزروا فيها, وكمان نسيت أقول انا غيرنا طبلة لبريك..و…و..وبطل المحرك يطفئ بس الطقه ما زالت موجوده والكفات مضبوطات, وبعد يومين اتصلت باللي ركبلي الجير وشرحتله عن الدبه اللي بالجير على الغيار الثاني قال: هذي الجير ما الهوش علاقه فيها هذي أصلا من (قواعد وآذان الماتور) رحت على ميكانيكي جديد لقيت فعلا كلامه صحيح, واتصلت فيه وقلتله: طيب يا محترم طالما الطقه من آذان الجير ليش خليتني أغير الجير؟؟؟؟يا رجل فعلا انكوا ما بتخافوش من الله.
