ما زلنا مع عمار الاسد..ايه و الله لخلّيك اتشوفني بكوابيسك..

قصة و حكمة:

الصورة هدية للمخبر تبع الصفحة و عمار بخش الاسد

القصة:
الباصات و البولمانات اللي جايبة أهل حلب و الشام و أدلب واقفة صف واحد على طول الكورنيش الجنوبي، و كل زوّار اللادقية على الأرصفة, اللي عم ياخود صور عالبحر، و اللي عم يشتري درة مشوية و اللي حامل الميلانة الخضرا..
جو ما بيوحي لشي أكتر من أنو يوم هادي و عادي من أيام صيف اللادقية 97…
قاعد على بلكونة رفيقي ببنايات الاسكان المواجهة للكورنيش،عم نشرب قهوة بعد الغذا، و عم راقب أهل حارة العامود اللي عم يمارسو رياضة الأكابر بين جموع زوار باقي المحافظات..
فجأة و بدون مقدمات، تلات سيارات ميرسيدس سودا، بيدخلو جوا حواري بنايات الاسكان باتجاه بيت عمار الأسد..
كل فكري أنو هالسيارات بتخص عمار، و الشباب جايبين اللحمة أو الخبز الطري للمدام بمهمّة أمنية فائقة السرية و هنن عم يستخدمو سيارات الدولة..
تلات سيارات بينزل منها عشر شباب، عصابة حسين ديب و اخوانو، عصابة بتشتغل بأعمال التشبيح عند اللي بيدفعلهون تمن مهمتو.. عشر شباب حاملين سلاحهون و طالعين على بيتو لعمار( نقيب المهندسين الدكتور عضو مجلس الشعب/ أسيادنا )..
تلات دقايق كانت كافية لتتحول الحارة من شارع عادي عم يتمشّو فيه أهل البلد و عم يتصوروا فيه الزوار لساحة حرب حقيقية..
تلات دقايق كانو كافيين لنشوف العشر شباب اللي طلعو على بيت الباش مهندس العضو، نازلين ركض و حسين ديب حامل بأيدو بنت صغيرة ما بيتجاوز عمرها الخمس سنين..
بالبداية كان صوت بكي هالبنت و صوت الخدامة من بلكونة البيت هوة الصوت الوحيد المرافق لهالمشهد..
ثواني و بيبدا ضرب الرصاص، ليختفي صوت البنت بعجقة هالصوت.. تلاتة من الشوفيرية و حراس عمار صارو يقوصو عالتلات سيارات ، و هالشباب العشرة اتمركزو ورا سيارات الحارة و صارو يبادلوهون ضرب الرصاص..الروسيات اشتغلت و المسبات و الكفر المرافق لصوت الرصاص كان معبّي الحارة، و الأب عمار عم يراقب خطف بنتو من داخل خزانات غرفة نومو..
أنا و رفيقي صرنا على أرض البلكون عم نتفرج شو عم يصير، و هالناس اللي عالكورنيش المقابل نزلو تحت السيارات تفادياً لشي رصاصة طايشة..
معركة بتستمر دقيقتين و بينسحبو هالشباب مع البنت الصغيرة بسياراتهون و بيطيرو على طريق الحرش..
يللي ما بيعرف اللادقية منيح، بنايات الاسكان مسكونة من كل رؤوساء فروع الأمن بالمدينة، و كلشي في ضباط كبار بالدولة..بالاضافة لبيت قائد شرطة اللادقية، و عالرصيف المقابل لهالبنايات بيجي بيت المحافظ مباشرة..كل الكولبات المعبّاية حرس مسلحين لحماية هالشخصيات العظيمة ، بالاضافة لعمار الاسد بذاتو، انضبو جوا محارسهون مع معلمينون بالبيوت و اللي عالأغلب كانو ملهيين بالتحضير لشي نصر إلهي من اللي بالي بالكون..
متل كل قصة باللادقية، بتصير الحكاية قدّام كل البشر و ما حدا بيعرف اللي صار لتاني يوم..
مين هالبنت و ليش حسين ديب و عصابتو خطفوها؟؟؟
سؤال كل اللوادقة ضلو بانتظار معرفة جوابو لتاني يوم لمّا داب التلج و بان مرج الدكتور العضو..
عمار الأسد متزوج وحدة من اللادقية من بيت الكاتب، و عندو بنت منها.. بس المدام عالأغلب استحلت و استلطفت ابن عمّوا حسين الاسد اكتر من عمار هالشبوبية الحلوة, و شردت معو بليلة مافيها ضو قمر..
بتهرب مع حسين و بتترك بنتها مع الدكتور عمار.. بس من كتر مو حنونة و قلبها على بنتها، طلبت من زوجها الجديد يجبلا ياها..
و من كبر قلبو لحسين الاسد قال : هلق اذا بدنا نطلبها عن طريق المحاكم بتاخود الحكاية هديك الحسبة، فخلينا نجيبها عطريقتنا الخاصة.. فاضطر يبعت حسين ديب و عصابتو لتنفيذ المهمة..
يعني يا عيني هالبنت: إذا سألوها بكرة بس تكبر مين البابا: رح تقلهون عمار الأسد، و مين زوج الماما : رح تقلهون حسين الاسد، طيب و مين الناني يا حلوة: رح تقلهون عمو حسين ديب..
ايه شو هالمشروع شبيحة هيدي؟؟؟

الحكمة:
دكتور و عضو مجلس شعب و نقيب مهندسين ، ايه و الله ليوصل صوت عواك ما بعد بعد الصين..