قصة و حكمة من زياد الصوفي..11

القصة:

ما بعرف سنتها شو خطر عبالي!! رحت فتحت كافيه انترنت بمنتجع الشاطىء الأزرق..

الدنيا صيف و مافي شبيح بالعالم -الله يرحم جدو – إلا و كان يصيف بهالاوتيل..

بيجيني الصبح مرافقة فراس طلاس و بيحجزو المحل كلو بالليل منشان ولاد المعلم يجو يتسلو بالليل حرام..

حجزتلهون كل المحل يومها، كمان حرام الأستاذ فراس لازم نعطيه شوية وقت يرتاح من هم الوطن و المواطن.. شوي يا جماعة و بيجي مرافقة كمال الأسد بدهون يحجزو المحل بالليل لاحفاد المعلم ، قلتلهون والله يا شباب مافي مجال اليوم المحل محجوز بالليل لولاد فراس طلاس..

ايه و شو هالخرة يعني!! بتلغي حجزون و بتقلون أحفاد الأستاذ كمال جايين..

أمركون يا خيي.. نحنا بأمركون..

إجا الليل و أجو هالاولاد مع رفقاتون يلعبو.. المرافقة شي قاعد برا المحل و شي جوا..

شوي و بيدخلو اتنين شباب و معهون تلات ولاد..

مرحبا معلم.. يللا طلعلنا العالم و فضيلنا المحل منشان ولاد المعلم يلعبو، ما بيحبو الضجة..

قلتلهون والله يا معلم الشباب أحفاد الأستاذ كمال و ما فيني طالعهون..

اتطلع فيني بنظرة استجحاش و قرب على داني و وشوشني: ايه هادول أحفاد القائد..

والله حملت حالي و قلتلو لكبير مرافقي أحفاد الأستاذ: والله يا شباب أحفاد القائد هادول.. دخلكون مين أهم؟؟ كمال أو القائد؟؟؟

الله وكيلكون أحفاد كمال خلال ثواني صارو بتخوتون لأنو عالاغلب إجا وقت النوم..

الحكمة:

قاضي الشبيحة شنق حالو…زياد الصوفي – مفكر حر؟