ويحرس نحو 20 من جنود القوات الخاصة التركية الضريح باستمرار. ضريح سليمان شاه
بعض الأولاد بيخلقوا و بيخلق معهون انواع من الحساسية تجاه بعض المواد او المأكولات..
اللي بيتحسس من الفريز، و اللي بيولع جسموا من السمسم، و اللي بيجي رح يختنق من ريحة شبيح راجع من حفلة تعفيش..
النظام السوري خلق من خمسين سنة و خلقت معو حساسية شديدة من الجار التركي، و زادت هالحساسية مع وصول الأردوغانيين الى كرسي السلطان .
و لكن نتيجة السياسة البراغماتية للزعيم التركي و اعتماد سياسة تصفير المشاكل مع الخصوم، سياسة أعطت نظام بشار الأسد لقاح مضاد للحساسية التركية استمر كم سنة من علاقة شبيهة بزواج المتعة ، و انتهى مفعول هالمصل مع سقوط اول شهيد في درعا ، و اعلان الطلاق بالتلاتة على لسان اردوغان ، لترجع عوارض الحساسية المتمثلة بجفاف الحلق، و الهرش، و النبش ، و النكش عند سماع كلمة تركيا على لسان اي احد، و زاد الطين بلّة على هالمرض ، شخصية اردوغان نفسها اللي جايبة لبشار و نظامو و مؤيدينو ما يشبه التهاب العصب الوركي اللي بيصيبهون عند اي شهيق سياسي بياخدو..
و هالحساسية ما جاية من الفراغ، الها ابعاد طائفية بالمقام الاول، و ابعاد جيوسياسية بتدخل بلعبة الكبار، و أبعاد نفسية اجت نتيجة معرفة النظام السوري بمدى جديّة الأتراك بأي شي بيتعلق بأمنهم القومي و بأي شي بيأثّر على خطة الألف ميل من التنمية و اللي بديو بتنفيذها ..
فلو اجتمعت كل قوى الارض بالطول و العرض ، و أرسلوا كل جيوشهم للانتشار على الحدود السورية، ولو حلّقت كل مقاتلات الدنيا فوق رأس النظام ، رح يضل النظام في مكان ما عندو بعض الإسفنجية السياسية لامتصاص وقع هالانتهاك ، و رح يقدر يمرّر تبريرات واهية تليق بعقول انصارو..
الا مع التركي ، فهالشي مختلف تماماً..
حساسية النظام من تدخل تركيا الوشيك رح تحطّوا في احد حلّين أحلاهم مر في مواجهة الهدف المعلن من التدخل التركي و المتمثّل باسقاط نظام الأسد..
فإما الاسد رح ياخود خط مواجهة الدفاع عسكرياً ، و هيك بيكون عم يوقّع بيان وفاتو بأيدو.
و اما رح يغض النظر عن الدخول التركي ، فهون بيكون عم يوقّع على بيان استسلامو و انتظار الموت الحتمي القادم من الشمال ..
و من لا يقرأ التاريخ محكوم عليه بتكرارو، فما أشبه كوباني اليوم بنورماندي الامس..
