اتنين بيشتغلوا بمجال الفن..
بس الفرق انو واحد فنان ، و التاني متل الكديش الفلتان..
اتنين بيعملوا بالشأن العام..
بس واحد بيحس البشر ، و التاني بعدو عايش ورا البقر..
اتنين إلهون جمهور عريض..
بس واحد بيحترم الجمهور اللي عملّوا اسم متين، و التاني متل الفجعان اللي وقع على سلّة تين..
اتنين بيطلعوا عالشاشة كل يوم..
بس واحد هدفوا يمتّعك، و التاني ما بدّو الا يفقعّك..
اليوم و على نغمات غنيّة خمرة الحب اسقينيها ، بصوت السوري الجميل حازم الشريف على مسرح أراب ايدول، انتفض الفنان الاول وائل كفوري من على كرسيتو، و دعى لرب العالمين من كل ألبو ، انو هالسلام اللي بصوت هالشب الحلبي الصغير يعم على كل سوريا، و ترجع المحبة لهالبلد اللي اعترف بفضلها على الفن العربي ، و لكن عالمقلب التاني من التاريخ ، كان صاحبنا الفنان التاني باسم ياخور عم يدعي الناس على صفحتوا دعوة صريحة و واضحة لمقاطعة أراب ايدول و متابعة صفحتو الشخصية..
على شو عم تدعي الناس ليتابعوك؟؟؟
اذا على هضمنتك!! فأنا بدعي الناس ترجع تحضر حقيقتك بدور فرج الغليظ في عيلة خمس نجوم..
و اذا على شجاعتك!!! فهي دعوة صريحة مني ليشوفوا رجولتك شو عمل فيها محمد فؤاد ببرنامج فؤش في المعسكر..
و اذا على إنسانيتك !!! فأنا عازم الناس ليشوفوك على حقيقتك في دور ابو نبال الضابط الدموي بالولادة من الخاصرة..
و اذا على ذكاءك!!! رح اترك الجواب للاستاذ حكم البابا اللي عرف اي دور يعطيك تماماً بمسلسل ايام الولدنة..
و اذا عن شهامتك !!! فدورك بجودة بيحكي تماماً عن هالموضوع..
و اذا عن سوريتك !!! رح أترك قارىء هالبوست يسمعلك شي لقاء على تلفزيون الدنيا من اربع سنين لليوم..
اعذرني وائل الكفوري، فالمقارنة مهينة مع هيك كائن فشل اخلاقياً ، و سقط مهنياً، و اتبهدل جماهيرياً بعد ما وقف في صف الجزّار بوجه الناس اللي عملتوا زلمة..
فرج فرجانا تقل دمّك..
و محمد فؤاد وضّحلنا انهزاميتك..
و ابو نبال عرّا ساديتك..
و جودة خلانا نشوف حقيقتك..
و حكم البابا نكش موهبة غباءك..
بس للامانة و لحتّى ما ننكر اهم اعمال الياخور بكل تاريخو المهني، و هون ما فيني ما اعترفلوا بالدور الوحيد اللي نجح فيه و اللي اقنع كل جمهورو بجدارة :
دور الشب المثقف باسم ياخور في مسلسل “الضحك على البشر”، و اللي بينعرض يومياً على صفحتو..
مواضيع ذات صلة: المثقفين على شاكلة باسم ياخور
