انت -ساقط- او راسب

بدا العديد من المرشحين الى البرطمان العراقي يعرفون مامعنى “التسقيط السياسي” خصوصا وانهم باتوا متاهلين واصحاب خبرة في كيفية التسقيط اثر انتقالهم من الميليشيات العديدة الى اعضاء مرحب بهم بالبرطمان.
كان هولاء وهم اصحاب ثقافات “خرنكعية”يعرفون ان التسقيط كلمة اشتقت من الساقط في المدرسة وليس المعنى الاخر المتعارف عليه عراقيا،الا انهم ومن باب “شوية” غيرة استبدلوها بكلمة راسب.
لكنهم وحين دفعوا “دم” قلوبهم على الحملة الانتخابية عرفوا بالضبط ماذا تعني هذه الكلمة بعد ان وضعوهم في صفوف خاصة ليشرحوا لهم ضرورة اتباع اساليبها لتحقيق الفوز البرلماني ومن ثم ملء الجيوب وحقاءب الرحلات السندبادية الى كل بلاد العالم الجميل تقريبا وتبداء من دولة الزرق ورق.
وولكن بعض هذه الجماعات التي ينتمي بعض اطرافها الى”بالروح بالدم” والبعض الاخر الى “الرجل الالي” والبعض القليل منهم الى”سهران لوحدي”كانوا قد تمادوا كثيرا في تطبيق هذا التسقيط السياسي، وقيل انه اجتهاد شخصي لا علاقة له ببرنامج الكتل السياسية المتصارعة على مقعد ابو البواسير.
ويوم امس تسرب تسجيل صوتي لمعركة طاحنة بين الزوج المرشح وزوجته.
سمعوا الزوجة وهي تصرخ:
-اسمع حبيبي ،خلصت وياك العمر كله،واريد منك الان ان تختار بيني وبين كرسي البرلمان.
-شنو صاير يامرة؟
– كل شي صاير،اولا انت تكول عندك برنامج انتخابي ،على عيني وعلى راسي ، بس جاي اشوف حركات غريبة…
– هذا مو شغلك يامرة.
لا حبيبي هذا شغلي،من تروح لصالون التجميل وتعدل حواجبك وتوكف الصبح كدام المرايا اكثر من ساعة واشوفك حيران من تختار اي “قاط”راح تلبس اليوم، ومن تصبغ شعرك، ومن…
– يامرة هذه ضرورات الترشيح.
– ياريتني اصدك ،انا مايهمني اذا صار براسك خير وصرت عضو برلمان ومطرت عليك الفلوس ،بس اللي يهمني ان تختار بيني وبين البرلمان..
– ماتفهميني شنو صاير.
– من توكف على المرايا بالساعات مو حبا بكرسي البرلمان وانما حبا بنفسك،يعني بديت تلعب لعبة وسخة وتتمنى ان تتزوج بعد الانتخابات…
– هذا شلون حجي يامرة.
– هذا الحجي التمام حبيبي،كلهم راح يساعدوك واولهم الشمري ثم مختار المحلة واخرهم صاحب العمامة صاحبك في كربلاء اللي كل يوم تخابره وتساله عن …
– يعني صايرة جاسوسة علي.
– لا والله حبيبي، اسمع صوتك العالي وسوالك عن الكيك وضحكاتك اللي ماسمعتها الا اخر مرة من اخذت قرض من بنك الرافدين قبل 10 سنين.
– شوفي اذا تستمرين على هاي الحالة راح…
– اي حبيبي انت تريد حجة حتى تفلت ومع هذا اعيد عليك الخيار.
– عيني،اغاتي انت،مستقبلنا بالبرلمان،تصوري انت تسافرين بجواز سفر دبلوماسي وتسوين حالك مريضة مثلا واخذ لك كم مليون من البرلمان وتخلصين شهر في باريس وشهر اخر في لندن وقبل ماتجين بيومين اتصل بصديقي دكتور رعد حتى يكتب لك تقرير طبي،شفتي شكد الامور سهلة.
– كل هذا ما يهمني اريدك تختار بيني وبين البرلمان وياريت تاخذ القرار بسرعة حتى نروح لمحكمة الكرخ ونصفي الامور.
-طيب شنو رايك اخلي صورتك ويا صورتي الانتخابية واكول زوجتي الحنون التي وقفت معي بالسراء والضراء،شمدريهم الناس اللي يتقشمرون بسرعة.
فاصل زكرتي:يبدو ان وزارة العدل مشغولة هذه الايام باعداد حفلات استعراض الطفلات اللواتي بلغن التاسعة من العمر وهو سن الزواج حسب الوزير الشمري حفظه الله ولهذا لم تول اهتماما الى مراقبة حالات الطلاق ونسبتها واسباب حدوثها.

محمد الرديني (مفكر حر)؟