المواهب السورية اللي عم تغرّد فوق سقف الوطن

خلال سماعي اليوم لأصوات السوريين المشاركين في برنامج أراب ايدول، و الأداء العظيم الممزوج مع ثقافة موسيقية نادرة ، مر قدّام عيوني شريط طويل من المواهب السورية اللي انسحقت خلال الأربعين سنة الماضية ، و اللي اختارت الغربة مرغمة لإظهار مواهبها..
و تذكرت حديثي مع صديق لبناني من كم سنة و قبل الثورة ، الحديث اللي انهيتو مباشرة بعد سؤالو الاستفزازي: نحنا عندنا جبران و المعلوف و الرحباني ، انتو بسوريا مين عندكون؟؟؟
يومها ما عرفت جاوبو ، بس اليوم صرت قادر قلّو و بالفم المليان عن المواهب السورية اللي عم تغرّد فوق سقف الوطن:
عندنا ايمن جادة مدير عام شبكة الجزيرة الرياضية ، و اللي لو ضل بسوريا لكان ماكسيموم مراسل لملعب تشرين في برنامج ملاعبنا الخضراء..
عندنا أصالة نصري المطربة العربية الاولى، و اللي لو ضلت في سوريا لكان أقصى طموحها تغني في مهرجان المحبة و السلام ، او بالنسخة المعدّلة مهرجان الوفاء للباسل..
عندنا الماغوط، و اللي ُترجمت اعمالو بكل اللغات، و اللي تسع و تسعين بالميّة من جمهور و ناخبي حافظ الأسد ما سمعانين باسمو..
عندنا رسام الكاريكاتور العالمي علي فرزات ، اللي اتكسّرت اصابعوا لمجرد رسمو لكاريكاتور مخالف لافكار سيادتو، و اللي لو بقي في سوريا لكان بالحد الأقصى مصمم آرمات فليكس على واجهات محلات دمشق..
عندنا الموسيقار مالك جندلي ، اللي دفعوا اهلو تمن لإسكات موهبتو ، و اللي لو استمر بلعب الموسيقا في سوريا ، لكان اليوم عم يلحّن لعلي الديك و فراس حمزاوي ..
عندنا الإعلامي فيصل القاسم صاحب اهم منير إعلامي عربي، و اللي لو اشتغل اعلام في سوريا لكان مقدّم لبرنامج أرضنا الخضراء ..
عندنا شباب كفرنبل ، مصنع المواهب الصارخة و اللي بحياتنا ما كنّا سمعانين بإسم ضيعتهون قبل الثورة، بينما اسم قرية القرداحة مصنع الاجرام و التهريب كان على كل لسان..
عندنا اهم الأطباء السوريين في مشافي اميركا ، و اللي لو مارسوا الطب في سوريا، لكانوا ممرضين في مشفى الأسد الجامعي أو في مستوصفات البادية..
عندنا اهم المهندسين السوريين في أوروبا، و اللي لو ضَلُّوا بسوريا لكانو موظفين في الإسكان العسكري و براتب عشر آلاف ليرة ، ليرة تنطح ليرة..
عندنا اهم القضاة السوريين في محاكم و دور القضاء الدولية ، و اللي لو ضلّو بسوريا لكان راسمالهون ميتين ورقة ان غلي سوقهون..
عم اكتب هالبوست و انا عم استخدم الايفون، فتذكرت خبرك يا صديقي عن شخص كنت رح أنساه ..
ستيف جوبز السوري و صاحب ثالث اهم تفاحة في التاريخ بعد تفاحة ادم و تفاحة نيوتن، لو شاءت الأقدار و ضل في سوريا الأسد لكان بالكتير موظف صيانة مُعتمد في مؤسسة مياه الحفة..