يا حسرة و بس..

يومين كاملين و العاصفة الثلجية عم تضرب الساحل الشرقي للولايات المتحدة.. اتغطّيت المنازل بالثلوج، اتسكّرت الشوارع ، انطمرت الحدائق ، و اتحولّت المدينة اللي عايش فيها لمدينة أشباح لا تسمع و لا ترى فيها الا أصوات سيارات الإسعاف و الإطفاء من وقت للتاني..
انقشعت العاصفة مبارح، و تركت هالمنطقة لتقوم بزيارة منطقة اخرى ، و طلعت هالناس من بيوتها لإصلاح ما سببتو العاصفة..
انا مقيم بحي سكني صغير في مدينة صغيرة بيسكن فيه الأبيض و الأسود و الاميركي الأصلي ، المسلم و المسيحي و اليهودي و اللي ما سمعان برب العالمين..
البسنا الجزمات، و حطّينا البرانيط على رؤوسنا و خرج اهل الحي بمجرّد ما شفنا رجال و نساء بلدية هالمدينة وصلو لكسح الثلوج..
رجال و نسوان ، أطفال و شيوخ ، الكل حامل ما تيسّر لمساعدة عمال البلدية .. الضحكة على وجوهون، و إلقاء التحيات و السؤال عن الصحة و الحال ، و عرض المساعدة للكبار بالعمر لتنضيف ما يمكن تنضيفو..
جارتي بالبيت اللي صوبي من جذور أيرلندية ، شفتها حاملة كيس بندق و عم تفضّيه في جنينة بيتها.. لمّا قررت اسألها ليش عم تعمل هيك عرفت السبب قبل السؤال.. عشرات السناجب اللي عالقين عالشجر من يومين بدون أكل ركضوا الى حديقتها و بين كل الناس و بدون خوف من آذى البشر صاروا يلمّوا حبّات البندق و يطلعوا فيها على أغصان الشجر البيضا..
جار تاني طلب المساعدة بحرقة من الكل، ركضنا لنشوف شو طلبو، بيخبرنا انّو في كيس طاير و عالق على غصن احد الأشجار اللي قدّام بيتو و بدّو مساعدتنا ليطلع يشيلو عن الغصن..
أتحوّل الحي لخلية من النحل الكل عم يشتغل للواحد، و الواحد عم يشتغل للكل ، و الجميع عم يعمل لمصلحة الحي..
دخلت على بيتي بعد تلات ساعات و الحرقة بقلبي..
فتحت الفيس بوك، شفت مئات الخنازير عم يهللوا لحيدرة بهجت سليمان على بوست كاتب فيه ” احرقوا يبرود “..
قلبت على صفحة تانية، شفت صفحة حلبية عم يتشفّوا زوارها من آكلي براميل الاسد من اهل نفس المدينة..
غط على البي، و رحت على صفحة لادقانية ، عم يزلغطوا زوارها الرعاع لقصف جبال التركمان و حرقها باهاليها..
سكّرت الفيس بوك و فتحت التلفزيون، شفت صور من مسيرة مؤيدة في اللاذقية لدعم ضارب السكود على اهل شمال سوريا..
أغلقت كل وسائط التكنولوجيا اللي بتربطني ببلدي، و اتحسّرت على عشر آلاف سنة ما قدرت اتحوّل البشري السوري الى انسان سوري، و وصلت لنتيجة مفادها :
قوة وحضارة الإنسان و رقي الشعوب ما بتجي نتيجة ترسانة نووية، و لا بوجود ست حاملات طائرات ، و لا كمان بعشرات آلاف السنين من الحضارة و العتق..
البشر بيتحوّل لإنسان لمّا بيتعلم يحب، و نحنا شعب مفهوم الحب عندو وردة حمرا و بيت شعر على ورقة مصفرّة، و غنيّة لام كلثوم في ليلة بيكون سحاب المازوت مغطّي فيها قمر الغرام..
يا حسرة و بس..