منشان حرية سوريا

حالة من اليأس تجتاح صفوف السوريين المؤيدين للثورة نتيجة الإحساس المتزايد يومياً بفقدان قدرتهم على التغيير..
هالشي ما اجا نتيجة لقوّة الاسد او قدرتو على إسقاط الثورة ، و لكن هالشعور اجا كنتيجة طبيعية لاحساسنا بعدم امتلاكنا اي اداة من أدوات التغيير اللازمة لإسقاط الاسد..

يا جماعة ..
ما بحياتها كانت الثورة لاسترداد أراضي محتلة، او تحرير أراضي و بسط السيطرة عليها..
ما خرج الشعب السوري للشوارع و نادى في بداية الثورة ” الشعب يريد استرداد دمشق”. طلبنا و شعارنا كان واضح و بسيط ، ” حرية و بس”..

شعار الحرية خوّف الجميع ، من اقرب جار الى ابعد صديق..حاربنا نفوسنا لتطلع كلمة الحرية من صدورنا ، و واجهنا كل صنوف الحقد لاستجرار أنفاس الكرامة من قلوبنا..
اللي كان معتقد انو تمن الحرية للشعب السوري رح يكون رخيص، فهاد إما انسان رومانسي او انسان ما بيفهم بالسياسة ، او الاثنين معاً..

خمسين سنة و النظام عم يحبك كل المؤامرات لمواجهة مطلب الحرية .. خمسين سنة و المجتمع الدولي عم يمرر أخطاء النظام الواحد بعد الاخر بحجة دعم الاستقرار في منطقة تعج بالمتناقضات..

منشان حرية سوريا.
شفنا المجازر و البراميل و الكيماوي ، و حضرنا تلاتة فيتو و اجتماعين دوليين في جنيف و شهدنا على وجود حالش و داعش ..
منشان حرية سوريا.
شفنا العراق عم يتفكك، و العسكر كيف رجعوا يحكموا مصر ، و اليمن كيف صار اتنين، و لبنان اربعة و من دون رئيس ..
منشان حرية سوريا.
شفنا الخليج عم يطرد قطر، و المشوّه بو تفليقة رجع يحكم الجزائر ، و انقلاب بعد التاني في ليبيا ، و وحل سياسي في شوارع اسطنبول..
منشان حرية سوريا.
شهدنا ولادة الخلافة بالأنابيب ، و تقهقر الاميركان قدّام مفترق الانسانية، و انهيار مؤسسة مجلس الأمن ، و تخبّط مؤسسات الامم المتحدة..
منشان حرية سوريا.
خسرنا مليون شهيد، و متلهون معتقل و مفقود ، و اتشرد عشرة مليون عن بيوتهون..
منشان حرية سوريا.
انهار مفهوم العروبة، و انمحت مرتكزات القومية العربية، و تعرّت المؤسسات الدينية و رجالها..
منشان حرية سوريا.
اكتشفنا انو في سوريين مو سوريين ، و عرب مو عرب ، و مسلمين ما بيتبعوا رحمة الاسلام، و مسيحيين بعيدين عن سلام المسيح..
منشان حرية سوريا..
انهارت مفاهيم المقاومة، و هرّت ورقة توت الممانعة ، و انتست القضية المركزية..

يا أبن بلدي..
لا تيأس .. فحريتك الغالية عم تحاربها كل قوى العالم، لانهون ببساطة بيعرفوا شو يعني يكون السوري حر..
بيجوز تقلّي صارو تلات سنين و نص و لسّا النظام ما سقط، بس رح جاوبك فوراً و من دون تردد، صارو تلات سنين و نص و العالم ما قدر يكسر إرادتنا..

حرية و بس..