معظم اللي طلعوا من سوريا طلعوا وهني حاملين سوريا جواتهن ..بس للأسف انت بسوريا وما قادر تحطها جواتك

Bassam Yousef
هاد البوست كتبتو من اكتر من سنة…. اليوم أنا بحاجته لنفس السبب اللي دفعني لكتابته حينها.
مبارح الصبح فقت وبما انو عطلة عملت فتّة حمص بسمنة ( وبلا منيّة أبو يزن ) وسمعت فيروز ووديع الصافي، ومدري ليش حبيت حطّ اغنية وديع “جاروا الحبايب علينا “..على صفحتي .
بتجيني رسالة ع الخاص من احد الاشخاص وكنا اصدقاء قبل الثورة وافترقنا بعدها، كما حدث مع كثير من السوريين بيكتبلي فيها :
– شوووو كأنك عم تشتاق لسوريا ..عجيب والله انتو بتحبوا سوريا وبتشتاقولها ؟!!.
ماردّيت عليه … بس هلّا رح ردّ عليه ع العام .
رح جاوبك على سؤالك بسّ قبل حابب وضّحلك كم شغلة .
أولا: بس تشوف انو سورية هي كل حبة تراب بسوريا مو بس محل مو عايش حضرتك ، وسوريا هي ال40 مليون سوري ويمكن اكتر ( اللي كانوا داخل سوريا وخارجها قبل الثورة ) مو بس طائفتك او اللي واقفين معك …ساعتها منحكي .
ثانيا : بس تصير عيونك عم تدمع على طفل سوري عم يشيلوه من تحت الانقاض بدون ما تسال هاد الطفل وين ومين أهلو وشو طائفتو ..ساعتها منحكي .
ثالثا : لما منظر الجندي الروسي اللي عم تشوفوا بطريقك وانت رايح ع شغلك بيحسسك بالاهانة والغضب وبتشعر انو هاد محتل هوي والايراني والتركي وكل واحد فات عسوريا … ساعتها منحكي .
رابعا : لما بتسمع عن اللي عم بيصير بالسجون السورية وبتبكي لانو هدول اخوة الك عم ترتكب جريمة بحقهن…. ساعتها منحكي .
خامسا: لما بتصرخ من وجعك على سوريين محاصرين بالغوطة وبالوعر وبدير الزور و..و… وعم يموتوا جوعا وعطشا …. ساعتها منحكي .
سادسا وسابعا وثامنا و..و…
بحب قلك شغلة .. معظم اللي طلعوا من سوريا طلعوا وهني حاملين سوريا جواتهن ..بس للأسف انت بسوريا وما قادر تحطها جواتك بتعرف ليش ..؟؟ لانو البوط اللي حطيتو جواتك احتل كل مساحة “جواتك” البائسة .