قصيدة من عالم الكلاب السائبه ( المقصود يختلف عن مضمون القصيده )
هناك حمله لقتل الكلاب السائبه في بغداد فأصطاد ذلك الصياد كلبا اصابه بقدمه فأراد أن يقتله قال له الكلب.
نعم سايب صدك..يل حاربت سياب
كبل ماانكتل رايد فقط مهله؟
تحاسبني عليمن شو الم اعضام
لا بايك نفط لا ناهب الدوله!!
ولك شايل وفه ايعادلك الخضراء!!
ما بوكن عراقي او اشرب ابدجله؟
وذا قصدك مرض ونأذي هاي الناس
إذن هاي الحكومه التنكتل اوله!
تموت اهل الوفه واهل الخيانه اتعيش!!
اشمالك ياشعب ماتندل العله ؟
صدك ذيلي عوج بس ينعدل مرات
لجن ذيل السياسي المحد ايعدله!!!
ولك شايف جلب عاف الغنم للذيب!!
رضه ابدم الحلال او راضي بالختله
انه ابن اليوافي او هاك اخذ تاريخ
انه الجدي رعبهم حارس المله
ثلث ميت سنه امناطر كهف ماكام!
عكس ذاك السياسي اعله الكهف دله!!
لتوصفهم جلب عمي احنه خوش اجلاب
ولك سامع جلب ماحامه عن اهله!!!
ولك سامع جلب ويه الحرامي ايبوك!!
ولك سامع جلب مايرحم ابطفله
انه الاشتم عدوك من بعد امتار
سياسيكم يشم لو بالخشم نشله
يصيادي انتبه مو وكت صيد اجلاب؟
وكت صيد اليعري او كاشخ ابدله
انه ابلحست عظم انطر ليالي اطوال
الملح بيه يخزر ما خنت اهله؟
يصيادي سلاحك وجهه عل خضراء
وانه الواجب تبدله ابحاكم الدوله!!
على الماليه حارس انه كون ايصير؟
اخو خيته اليبوك او ياخذ السله
وجيبن جم جلب من كل زباله اثنين!!
وعض كلمن يبوك او ينهب الزبله!!!
اصرح لا زبايل لا نريد احزاب!!
ولاعدنه طوائف كثره لو قله!
لون جل الوفه شد عل جلب دستور!!!!
يصونك مايخونك يعمر الدله
#محمودالحسني
…………..
تعليق الشيخ / س . السندي
١: گالو چلب ..؟
گلت نعم چلب وإبن چلب
بس مو مثل چلبكم الخان الزاد والملح
وباع وطنه وشعبَ ودينه وأصله وفصله والدولار گل همه
أنتوا هم شفتوا چلب يغدر بجارة لو يترك أخوه يغرق بدمه
حرام عليكم تشبهونا بساستكم ، لو أهل غيرة وشرف ونخوة
،چان العراق صار دبي الشرق ، وما خلوا غريب يغتصب خطته وأمه وبنت عمه ؟
٢: وزير التجارة الحرامي ” فلاح السوداني” عاد به الإنتربول للعراق ، حتى يخرج بكفالة ويطالب بتعويض عن الاهانه والخسارة ، لو تعيني وزير لو أشعل الحارة ، سلام ؟
