قصة و حكمة من زياد الصوفي.. 92

القصة:

وحدة من أطرف المفارقات اللي صارت مبارح عالفيس بوك ، صفحة بتخص السيدة الأولى و بتحمل اسمها ينذكر و لا ينعاد، ذكرت على بوست من بوستاتها بعد الشتيمة اللي ما بتناسب قراء هالصفحة: زياد الصوفي يقوم باهانة رموز الدولة..

ركزولي على كلمة رموز الدولة الله يرضى عليكون..

و من عاداتي متل ما الكل صار بيعرف، أنا ما بحب رد على أي بوست بيتهم الثورة بشكل عام و أي بوست بيتهمني إلي بشكل خاص.. لأنو لمجرد الرد عليهون عم نعطيهون شرف ردة الفعل و هنن ما بيستحقوه..

بالعودة لرموز الدولة..

خديلي هالقصة أيها السيدة الأولى عن رمز من رموز دولتك و خبريني رأيك بما انك مهتمة بالصفحات اللي بتتعدى على رموزك..

حكاية اليوم صارت بالنص التاني من تسعينييات القرن الماضي..

سوق الخضرا باللادقية بوحلو و ريحة الجاج المنتوف المختلط بريحة مطر اللادقية، ولعان من الصبح و الناس نازلة تشتري خضرتها و فواكتها و شوية لحمة للاستمتاع بغدا بظل أمن و أمان البلد..

عالدوااءءءءءء يا بطيخ..

عالسكين يا جبسسسسس..

خمس و عشرين صفد البيض..

ما كسر صوت عجقة السوق إلا صوت اتنين شباب بنهاية السوق باتجاه نادي حطين..

شباب من عائلة المغربي، راكضين ورا بعضهون و واحد عم يهدد التاني و يسب عليه من الزنار و نازل…

البياعين تركو أعمالهون و ركضو يشوفو شو عم يصير.. الناس فلتت أكياس الخضرا و قعدت تتفرج شو نهاية هالمشكلة..

محل دهانات بنهاية السوق أبوابو مفتوحة، بيدخلو هالشبين عليه و بيختفو..

رجعت البشر لأعمالها ، و الناس لتسوقها لما شافو أنو مشكلة ولاد ، و ما شي بيشغول بال اللوادقة ليحكو فيه تلات شهور بعدين..

العجقة انكسرت مرة تانية، لما سيارات الشرطة و الأمن بعد بربع ساعة عبت السوق..

و رجال الشرطة و الأمن ركضو لجوا محل الدهانات و طلعو شب من هالشبين جثة ميتة، و التاني طالعوه مكلبش بالكلبشة تحت ذهول كل الجيران بالسوق..

أبو صبحي والد الشب المعتقل، بيطلع برا المحل و بيصرخ: و لا يهمك و لك ابني، أنا بعرف كيف خلصك من هالمصيبة..

اتحول الولد عالنيابة و انحط بالسجن بانتظار محكمتو العادلة..

بهالاثناء أبو صبحي بياخود الطرق السهل..

لازملو محامي، فما انتصح من جيرانو و قرايبينو ليوكل لابنو محامي شاطر، راح حمل حالو و دخل على مكتب الأستاذ المحامي الرمز فواز الأسد..

و ركزولي مرة تانية عالرمز الله يرضى عليكون..

داخل عليك يا استاذ، ابني رح يروح إعدام فيها..

ولك خلص بقا ليش هنت مكبرها، اتركا علي و ما تاكل هم.. بس اسماع يا بو صبحي، القضية بتكلفك خمس ملايين ليرة، روح جبلي ياهن و تعا…

بس يا استاذ، أكيد بيطلع ابني؟؟؟

ولك هنت جحش ولا شو؟؟ ما قلك روح جيبهن للمصرات و تعا…

بالفعل، بيروح أبو صبحي بيلم هالمبلغ و بيحطو على طاولتو للرمز فواز بانتظار محكمة الولد…

يوم المحكمة إجا، و عيلة الميت كلها موجودة بباحة ما يسمى بالقصر العدلي باللادقية، و عيلة القاتل جايين ليشوفو هالخمس ملايين و أبو جميل شو رح يعملو…

محكمممممممة…

سيدي القاضي، حضرات المستشارين.. و لشو ما اتضيعو وقتكن الكريم بهيك قصة.. الولد ما عمل شي و لا قتل حدا..

بس يا سيادة المحامي، في شهود كتير حكيو غير هالحكي اللي اتفضلت فيه..

ولك شو بيفهمن هودي الشهود الجحاش، أبتعرف أنو كلهن حشاشة و كشيشة حمام و المحكمة ما لازم تاخود بشهاداتن..

لا يا استاذ ، في شهود كتير حضرو الحادثة و ما فينا ما ناخود بكلامهن..

هون الرمز فواز، لما حس أنو مناورة الحشاشة و كشيشة الحمام ما رح تنفعو، فقرر التالي:

يا سيادة القاضي كل شهودك كذابين و أنا عندي اعتراف بدي قولو..

ايه اتفضل استاذ..

الولد ما قتلو لهالشب.. أنا اللي قتلتو…

المحكمة سكتت، و القاضي شاب شعرو لهالاعتراف، و أهل الميت ما عاد يعرفو شو بدهون يعملو..

ايه ايه أنا اللي قتلتو.. و ليش متفاجئين يعني.. و بطالب المحكمة بالإفراج فورا عن موكلي و تحويلي إلي القاتل الحقيقي للمحاكمة..

انتهت الحكاية و رجعت كل البشر لبيوتهون، و رجع الرمز ليمارس رمزيتو…

الحكمة:

الدولة و رموزها متل ما بتعتقدي مانها دولة النعيم..

رح تكوني السيدة الأولى أكيد، بس على أبواب الجحيم ..