القصة:
اتعمدت عند كتابتي لهالحلقات أنو حاول غطي كل أنواع الإجرام و الترهيب اللي مارسوه بيت الأسد و شبيحتهون بسوريا عموما و باللادقية خصوصا..
حكينا عن كلشي..
و اليوم رح احكي عن السلبطة..
السلبطة باللادقاني بتعني: أخدك لمال غيرك من دون حق..
و السلبطة بالمناسبة من أهم صفات هالعيلة.. و كل شخص اسمو ملحوق بهالكنية، ألو قصص لا متناهية بالسلبطة على الناس..
على تلة صغيرة صوب مقبرة ناعسة بالقرداحة خلص منذر الأسد بناء قصرو الجديد.. من جهة بيطل على جبال اللادقية و من الجهة التانية على مقام شفيعة القرداحة ناعسة قدس الله سرها..
فيلا تلات طوابق بواجهات كبيرة من الأرض للسقف..
بأحد زيارات مرتو قبل ما تموت لعند أختها، بتشوفها مركبة برادي جداد..
ايللللللللللة.. شو هالبرادي الحلوين إنشالله مبروكين.. من وين اشتريتهن؟؟
أول لعنة على أبو محمد صاحب أهم صالة ستائر باللادقية وقعت عليه لما قالتلا أخت المدام أنو البرادي من عندو..
أبو محمد انسان عصامي إجا عاللادقية من فترة طويلة هوة و عيلتو و فتح هالصالة و بيشتغل فيها مع أولادو التلاتة..
المدام بتخبر زوجها منذر عن البرادي، فبيبعت وراه لأبو محمد منشان يطلعو عالفيلا الجديدة و يركبلو برادي جدد..
الحكاية صارت بال 2002 و السوق كان واقف و مع ذلك ما ارتاح أبو محمد لكل هالبيعة..
أسمع يا أبو محمد: عندي مكتب صغير، رح جربكن فيه بالأول و بعدين باخذك عالقصر حتى تاخود القياسات إذا عجبني شغلك..
بالفعل هاد اللي صار و ركبلو شي كتير عجبو لمنذر بالمكتب و اتفقو تاني نهار ياخود أبو محمد الورشة و يطلع عالقصر..
بعد ساعة تمتير و اخد قياسات بيقلو أبو محمد والله بيكلفوك يا استاذ 450 ألف ليرة..
ايه يللا خلي الشباب لكت يبلشو شغل..
بعد ما خلصو تركيب بيشيل 200 ألف و بيعطيه ياهون و بيقلو الباقي بعدين بدفعلك ياهون..
مرت سنة على هالقصة و المصاري ما وصلو لأبو محمد.. اللي بيوصلو بعد سنة، تلفون من البوبو مدير مكتبو لمنذر: أبو محمد بتجي فورا عمكتب الأستاذ، جانن بدو ياك.. جيب معك ال 200 ألف و تعا فورا ،ولك شو عامل شو عامل ؟؟
حافظ ابن منذر مكسر البرداية بالطابق التالت من القصر و منذر حاطط كل الحق عاللي ركبهون..
بياخدلو ال 200 ألف و بيبعت الورشة فورا ليصلح..
هوة و عطريق القرداحة بيجي تلفون من مكتب منذر: اسمع يا أبو محمد ابنك حاجزينو عندنا، بس تجيب سياخ أميركية و تركبن و يعجبوه للأستاذ منذر منطالعو لابنك..
مسكين هالابو محمد، تلات أيام ناطر السيارة تجي من بيروت لتجبلو السياخ الأميركية حتى يفك أسر ابنو و يخلص من هالمصيبة..
بيطلع و تحت نظرو الورشة كل النهار عم تشتغل بقصر الأستاذ لحد ما خلص النهار و خلصو تركيب..
بيدخلو شبيحة الأستاذ و بياخدو شباب الورشة كلها و بيحطوهون مع ابن أبو محمد بنفس السجن لحد ما يجي منذر و يكشف عالشغل..
بيوصل الأستاذ بعد يومين و الشباب محبوسين بالقصر و معهون معلم صحية كمان أسير نتيجة تسريب شوية مي بمطبخ القصر..
بعد ما اتطمن منذر أنو الشغل تمام، بيصرف العمال من البيت و بيطلبو لأبو محمد منشان الحساب..
منذر مع محاميه قاعدين ناطرينو لأبو محمد بالمكتب و محضريلو المفاجأة..
رح تدفع يا أبو محمد 150 ألف ليرة عطل وضرر و رح اتوقعلنا عهالتعهد انك بتضمن البرادي 200 سنة..
الحكمة:
البرداية الوحيدة اللي بفهم بدها تركيب من بين كل هالبرادي..
برداية الشباك اللي بيطل عقبر ناعسة، أم المجرم و جدة السادي..
