فلا تستعجلو الاحتفال بالنصر يا خائني الوطن، الاسد لسا ما شلح

خلص اليوم الاول من المهزلة السيادية ، و قدر نظام الاسد يلهي انصارو بموضوع تنسيق ضربات التحالف من عدمها مع الاسد، و ذلك لتغطية خيبات المؤيدين و امتصاص غضبهون بعد ما كانوا مصدقين فعلاً حكاية المقاومة و بدعة الممانعة و كذبة السيادة من كل عقلهون..
ماذا سيقدّم النظام من حكايا لمناصريه اعتباراً من يوم الغد بعد ما سقطت كل خزعبلاتو و هرطقاتو الممانعجية مع مرور اربع و عشرين ساعة فقط من بدء العمل العسكري لجيش التحالف!!!
في يوم واحد فقط ..
سقط مفهوم الممانعة مع استجداء و شحيدة الشراكة مع من وصفهم الاسد على مدار اربع سنين بأنهم اصحاب المؤامرة الكونية على سوريا..
في يوم واحد فقط..
سقط مفهوم المقاومة بعد الموقف المتجدد و المتجمّد و المتمثل بالاحتفاظ بحق الرد بعد إسقاط اسرائيل للطائرات الاسديّة..
في يوم واحد فقط ..
سقط مفهوم السيادة بعد ما انتُهكت سما سوريا بمقاتلات و طيارات من دون طيار و صواريخ من دون القدرة على صدها او حتى رؤيتها..
اربع و عشرين ساعة أنهت كل شي..
أفاق الممانعجي من حلم الممانعة بعد ما كان عم يستمتع بإسقاط الطيارات الأمبريالية و البترودولارية في المنام ..
و استيقظ مرتعباً المقاومجي على هدير التوماهوك فوق سما سوريا..
و فتح عيونو الواهم بالسيادة على تصريحات الاسد السيادي بتوسّل مشاركة أعراب الخليج..
لم يعد للأسد ما يقدمه الى مناصريه الا شيء واحد بيملكو و بيقدر يبهر فيه منحبكجيتو من جديد، و يمحي فيه هاليوم الأغبر بتاريخ الممانعة..
سلاح واحد متبقّي في يد الاسد تاركو لغدرات الزمن اللي عاشها بهالاربع و عشرين ساعة..
سلاح سيقضي على فصول المؤامرة الكونية ، و سيعيد السيادة المسلوبة ، ليستعيد الاسد به ثقة مؤيديه المهتزّة..
يا ثوار الناتو.. يا عراعير المستقبل..
وعد الاسد انصارو من زمان بشلح الطقم و لبس البدلة العسكرية، و ما بين الشلح واللبس في مرحلة رح يتصور فيها و ينشر الصورة..
بعيونو الزرقاء الدبلانة رح يعيد فكر المقاومة الى مجاري عقول المقاومجية..
و بسلبة كتافو الزاحطة رح يستعيد هيبة الدولة عند اللي شعر بفقدانها من شبيحة السيادة..
و بسيقانو المشعرة رح يشعل الروح القومية مرة تانية عند مريديه كيميائياً و فيزيائياً..
فلا تستعجلو الاحتفال بالنصر يا خائني الوطن، الاسد لسا ما شلح..