الله يلعن أمثالكون ، طلع مضروب اختو هالحشيش

لمّا ارجعت من سوريا على دبي في المحطة الثانية من غربتي الشخصية بعد بداية الثورة ، اسمعت عن مقهى في دبي مارينا اسمو “الحميدية” ، مقهى ما بيقعد فيه الا الشبيحة و النبّيحة و منحبكجية الاسد ..

ما خطر ببالي بيوم من الايام انزل و اتفرّج على عرض المسوخ المجاني لوحوش جمعتهون عبادة القائد تحت سقف مقهى بيعج بريحة دخان المعسّل الممزوجة مع نتانة قلة الضمير اللي طالعة منها..

ضليّت كابر بالامتناع عن مشاهدة هالعرض، لحد ما اجت مناسبة بدعوتي على افتتاح مقهى مجاور للحميدية، فاضطريت مر من هونيك ، و سرقت نظرة لداخلو..

شفت اللي بتلاقيه راتبو تلات آلاف درهم إماراتي و عايش بغرفة وحدة شراكة مع تلات أسديين بيشبهوه، بيدفعوا ربع راتبهم أجار و نص راتبهم وجبة يومية وحدة و الربع الباقي لتسديد فواتير الكريديت الكارد الغرقانين فيها..بس معلشي المهم سيادتو يكون مرتاح هوّة و عيلتو بقصورهون..

شفت اللي بتلاقيه هربان من خدمة الجيش، و عم يدفع الفوقو و اللي تحتو منشان تأجيل الخدمة ، و يخلّي ابوه يتوسّل لشي بو حيدر ما بيسوى تلات قروش بالشام منشان يطالعلو سند إقامة..بس معلشي فدى بواسلنا و جيشنا البطل اللي عم يموتوا من ريحة بواطهون..

شفت اللي بتلاقيه عايش بالقلّة لانو لازم يشيل كل شهر شوية مصاري منشان يدفع الخمس آلاف دولار بدل خدمة الجيش بعد خمس سنين تعتير..بس معلشي فدى رامي مخلوف ، المهم تنصاب حساباتو بالتخمة ..

شفت اللي بتلاقيه عالسكايب كل يوم مع شباب حارتو بسوريا عم يشكي الذل ، و يبكي الهم، و تشر مخطتو من الغم.. بس معلشي فدى اسماء و كنادرها و جزادينها..

شفت اللي بتلاقيه عم ينقلى بشوبات دبي ، و ينشوى بجهنم ابو ظبي ، و يغيّر قميصو تلات مرات باليوم ، و يتعتّر بعجقة الشارقة الصبح و المسا..بس فدى ولادو للرب بشار المهم هنن يضلّوا مبوردين..

شفت اللي بتلاقيه عم يسب اللحظة اللي بترن فيها ساعة المنبّه الصبح، و يلعن الثانية اللي شالتو من حضن آمّو و رمتوا بانتظار الباص ليوصل على شغلو قبل ما يسمع شي كلمة من مديرو اللي شايفو اقل منّو بكتير..بس فدى ولاد عم الاسد ، المهم هنن ما يركبوا باصات..

يا مسوخ الحميدية .. يا مؤيدي بشار الاسد..يا ناخبي المجرم..
لو كنتوا رضيانين بسوريا الاسد كوطن للعز و للفخر و للكرامة ، ليش لتستبدلوه بالحميدية كوطن بديل إلكون ما بيمثّل الا الفقر و الذل و التعتير..ارجعوا عيشو تحت ريحة بوط الوطن، و شو بدكون بريحة المعسّل..

أمّا اذا مُصر تنتخب بشار ، خود من وطنك الحميدية طلبية شيش..
و بوجهك روح مع رفقاتك عالجزيرة الإيرانية كيش..
فالإمارات بلد بيعيش فيها البني ادم ، ما فيها مكان لأمثالك يا كديش..
الله يلعن أمثالكون ، طلع مضروب اختو هالحشيش:)