الدكتور عمار بديع الاسد، و دكتور الجماهير المتعدد المواهب دريد رفعت الاسد

و ما زلنا بأجواء العضو الدكتور عمار بديع الاسد، و دكتور الجماهير المتعدد المواهب دريد رفعت الاسد..

بتتذكروا دعاية

Yes

تلاتة بواحد؟؟

هيدي قصّة تلات ابضايات أسدية عالفيس بوك، بيستعرضوا عضلاتهم من ورا الكيبورد، و لما بيجد الجد بتلاقيهون عأول طيارة هاربين و تاركين وراهون المهللين و العبيد على صفحاتهون لمواجهة مصير حتمي قادم..

حطين و تشرين هنن الأندية الرئيسية في مدينة اللادقية.. شباب البلد مقسومين بدعمهون و تشجيعهون بين هالفريقين..
هالشي ما كتير لاقى استحسان الجهات المختصة، و قرروا يأسسوا نادي جديد و يضمّوه للاتحاد الرياضي العام..
المقر مدينة القرداحة..
اسم النادي ” العرين ” ..
رئيس النادي الدكتور متعدد المواهب دريد رفعت الاسد..
و بما انو ميزانية هالنادي مفتوحة، فقررت الادارة والمتمثلة بدريد الاسد استحضار خيرة لاعبي حطين و تشرين و إغراءهون بالألقاب و بالوعود الأسدية الفارغة..
و بالفعل تم الامر..
أفضل لاعبي المدينة انضموا الى عرين الاسد، و اتعيّن الكابتن علي الجندي لتدريب الفريق المذكور..
كل يوم يطلعوا أشبال الاسد ليمارسوا التدريبات بملاعب المدينة الرياضية ، و كل كم يوم يطلع دريد الاسد لتفقّد الرعية و ليشوف اذا صاروا برشلونة او بعد بدهون وقت..
أثناء احد تدريبات الفريق، بتوقف سيارة ميرسيدس بيضا و بينزل منها العضو عمار الاسد، و معو كابتن الكباتن علي عدنان نجيب ( احد اكبر شبيحة اللادقية الفيسبوكيين و صهر دريد الاسد)..
و الله هالشبين لابسين تياب الرياضة و طاحشين على الكابتن علي الجندي بثقة مارادونا، و بإتقان رونالدو، و خفّة ميسّي، و بقلب أشبه بلون اللاعب بيليه ..
مين فيكن المدرّب؟؟؟؟؟ صرخ العضو متأبطاً بذراعو سندويشة بيض مسلوق مع بيتنجان مقلي..
على هول الصوت المفزع، نظر الكابتن علي الجندي و قلّو : انا المدرب كيف فيني أخدمك ؟؟
– بدنا نلعب انا و هالشب بفريق العرين، انا جناح يمين ، و هالنجيب علي نجيب جناح يسار، شو قلت؟؟؟
هون الكابتن علي الجندي ما قدر يقاوم هالعرض المغري بانضمام فطاحل الفوتبول لفريق العرين، فتم قبول العرض..
و بعد الانتهاء من حصة التدريب الاولى، و اثناء مغادرة الفريق لأرض الملعب، صرخ عمار الاسد للمدرب انو ينزل معو بالسيارة و بلا شنططة الباصات..
عمار الاسد و صوبو علي نجيب في المقاعد الأمامية ، و الكابتن علي الجندي و معو لاعب بالفريق اسمو عمر بالمقاعد الخلفية..
و أثناء حفلة استعراض مهارة قيادة السيارة بعد ما أتحفنا باستعراض مهارتو بالفوتبول، وصلت السيارة الى شارع الجمهورية..
باص سيرفيس بيمر من قدّام العضو بطريقة استفزازية لمعاليه، باص بيقودو شخص بيشتغل أمن عسكري صباحاً، شوفير سرفيس بعد الضهر، و شبيح عند دريد اثناء الحاجة بما انو من مخلفات سرايا الدفاع..
هالحركة الاستفزازية جننتوا للعضو، و قرر يلاحق هالشبيح المتعدد الوظائف و يوقفو عند احد مفارق شارع الجمهورية..
بينزل العضو و معو علي نجيب عالشوفير و بيبدوا ضرب فيه ليموت ما مات..
اللي ما كانوا بيعرفوه، انو هالشوفير بيشتغل عند دريد رئيس نادي العرين ، و السرفيس بيملكوا دريد كنوع من المشاريع الاستثمارية الضخمة اللي انشأها بهالبلد..
رجع العضو و صاحبو عالسيارة بعضلات منفوخة من عظمة اللي عملوه، و قعدوا يشرحوا للكابتن علي الجندي تداعيات اللي بيعترض على احد ابناء بيت الاسد..
تاني نهار اجا، و الشباب وصلو الى ملعب التدريب، و الكل عم يحكي بالبطولة اللي عملها العضو ليلة أمس مع شوفير بشارع الجمهورية..
ثواني و بتوقف سيارة الدكتور الفنان الرسام الفيلسوف دريد الاسد و بينزل متل التور الهايج و بيجمع الفريق..
ولك عمار هنت حيوان شي؟؟؟
ليش ليش يا دكتور، خلص بقا ما تحكي معي هكّا قدّام عراعير المستقبل منشان هيبتنا ..
بيشيل أيدو دريد الاسد و بيخلعوا كف لعمار الاسد بيخلّيه يسقط ارضاً، و بيصرخ فيه بيقلّو :
اللي بيضرب حدا من رجالي كأني ضربني، فهمان يا ابن الطبّال؟؟؟
و بيصرخلو صوت لعلي نجيب صهروا، و بيخلّيه يركع عالارض قدّامو و بيخلعوا كف لهلأ عم يرن بادنو للنجيب علي نجيب..
بتنقلع هنت و هوّة برّا الملعب ، و أبدي شوف واحد فيكن هون، فهمانين هنت و هوّة ؟؟؟
بيلمّو الشباب كرامتهون عن الارض ، و بيضبوها مع بوط الرياضة بالشنطة، و بيجرّوا أذنابهون وراهون، و بيحرموا العالم من ولادة نجمين كرويين..

و ما أشبه اليوم بالأمس ..
فبدل ممارسة الفوتبول الحقيقي مع فريق حقيقي صاروا يلعبوا فوتبول عالبلاي ستيشن، و بدل المراجل و النزول بالسلاح عالجبهة اليوم، قاعدين ورا الفيسبوك عم يستعرضوا العضلات المنفوخة بوتوكس..