الارتباط بالمعسكر الغربي بما يناسبنا من قيمو و الارتقاء في سوريا الى مصاف الدول الطموحة

عندما تقرأ في تاريخ الشعوب، بتواجه حقائق صادمة في احيان و حوادث بتوقف عندها بدهشة كبيرة في احيان كتيرة..
لعل خروج الجيش الأسدي من بيروت في احد اجمل ايام اللبنانيين في ربيع ٢٠٠٥ و ردّة الأفعال المتناقضة عند الشعب اللبناني و اللي بأغلبو وقّف بساحة الحرية في ١٤ آذار ابتهالاً بخروج المحتل الأسدي ، و جزء اخر من هالشعب وقّف في ساحة تانية في ٨ آذار ليقول ” شكرًا سوريا الاسد “..
التاريخ اليوم عم يعيد نفسو في أوكرانيا.. جزء كبير بدّو الانسلاخ عن الدب الروسي و الالتحاق بمجرى التاريخ المنطقي و الطبيعي، و جزء ما يزال يرى بالبوط العسكري البوتيني سقفاً لحدود وطنو..
رح احكي بجرأة اليوم و أكسر محظورات الحديث بالارتباط، و اسمحولي نسمّي الأشياء متل ما هيّة..
العالم اليوم بكل أممه بين فكي كمّاشة، كفيّن حلواهم مر..
و ارتباط سوريا بأحد هذين الكفّين شر لا بد منّو ، فهذه سنّة الشعوب في الألفية التالتة..
و الخيارين واضحين لا ثالث لهما..
أمّا الارتباط بمعسكر ايران و روسيا و هالدول المارقة اللي بتشبهها و العودة بسوريا الى زمن محاربة الطواحين، او الارتباط بالمعسكر الغربي بما يناسبنا من قيمو و الارتقاء في سوريا الى مصاف الدول الطموحة..
الشعب السوري بدّو الحرية و السلام، هرمنا خمسين سنة و نحنا بانتظار المعركة الكبرى الوهمية ، شعب عاش بحالة اللاحرب و زمن اللا سلم عم يقلكون:
نحنا شعب بيكره الحروب و بدنا السلام ، حلّوا عن سمانا بقا..