Salwa Zakzak
واحد معفش مكنسة كهربا فستقية موديل البرميل..والمعلّم مصر يطالعا معو بالسرفيس..
وطلعت ! جمدنا كلنا،في ست حطت ايديها عليها وقالتلها تغربتي ياغالية؟ وحدا مسح عنها الغبرة وقلها حرام تفوتي عبيت غريب بغبرة بيت أهلك..الشوفير شارط المعفش انو ياخدلها كرسي ويدفع عنها راكب مشان ما تسكر الطريق..ولانو ما بتوسع عالمقعد الجنابي الضيق..قعد هو عليه وستتها عالمقعد الطبيعي…
شعور غريب انو انا قاعدة بلزق مكنسة الكهربا..حركشتها ماردت..حاولت أعرف اسم ابوها او أمها ما نطقت…بس وشوشتني وقالتلي اتطمني موتوري محروق ومالي قطع تبديل والمعلّم تعب بحملتي عالفاضي..وضحكنا انا وياها لعند
السما…وكل الركاب ضحكوا معنا إلا المعفش كان عم يعمل حساباتو ويخربش أرقام عدفتر صغير مكبوب عليه متة..
وبس نزلوا غنينالها بيت العز يابيتنا..وراحت كرج…
سلوى زكزك: كاتبة سورية