Salwa Zakzak
دق الباب..شبيب عم يبيع محارم ومماسح.. بترجي قللي اشتري مني بدي خفف والله هلكت..فعلا معو كيسين كتير كبار..بس بينق كتير..كأنو جاية يشحد مو يبيع..
بدي كاسة مي..تكرم..شرب القنينة كلها..الممسحة ب٤٠٠..قلتلو ب٢٠٠ بالسوق..قلي طيب وعتلتي وطلعتي والشوبات..اتفقنا ال٢ ب٥٠٠..قلي عندك حبة سيتامول راسي رح ينفجر..عطيتو حبة سيتامول..رجع قلي خدي ٤ مماسح بألف..قلتلو تكرم…قعد عالأرض وقلي معليش تعبيلي القنينة؟ بس كمان باردة؟ وعبيناها..
اخدت المماسح وحاسبتو، يادوب سكرت الباب، رجع دق.. وقللي المصاري عالقد للمعلم ومابيزيد معي حق خبزة..سكبنا صحن من الموجود، صحة عقلبو أكل..ورجع قلي خدي محارم..المحارم كتير تقال .خففي عني تقل الله يخليكي.
قلتلو ما بدي..اخدت الصحن وسكرت الباب..رجع دق وقللي عندك سيكارة؟؟؟
سكرت الباب بعد ماقلتلو لا بعصبية مرة..زعلانة عليه مو منو..بس القصة تشعبت وصارت مصايب..رخاوة مرعبة واستعباد مريع..حسيتو مابيقاوم أي شي لياكول ويدخن..حسيتو ضايع عالأخير وقصة الشغل جزء من ضياع كبير..
انا مابعطي نصايح لحدا غرقان بالقهر وتايه..هادا الشب بدو احتضان بالاول..يعني عيلة واعية وكدعة ،مركز، اعادة تأهيل، ترتيب أولويات..بدو متابعة…كاسة المي وصحن الأكل ما بيرجعولوا آدميتو… وأنو نعطيه مصاري اكتر بكتير من قيمة الغرض بتصير تشحيد رسمي…
الشب عمرو ١٤ سنة ومافات عالمدرسة أبدا..وماقدرت أسألو عن أهلو وقصدا..حسيت هالسؤال مو مهم جوابو منوب. ولابيقدم ولا بيأخر…
كم جيل ضيعنا؟؟؟؟؟؟؟