Bassam Yousef
يرن الهاتف في مكتب “السيادة الوطنية” العقاري.
يرفع أبو البيش سماعة الهاتف:
– مكتب السيادة الوطنية العقاري … مين معي ؟؟.
ماكرون: مرحبا خيي أبو البيش .
بشار: ولك أهلااااااا بخيي ماكرون … هلا عيوني هلا …
ماكرون: طمني عنك … شو عجبتك الضربة … ؟؟ ماتقلي… ماعليها حكي بنوب .. خفيفة نضيفة وعطيناك الوقت اللي طلبتو …
بشار: الله يكتر خيركن …. لا بالله مابقدر احكي شي، وكتير استفدت منها.
ماكرون: أبو البيش إلك ولا للديب ؟؟.
بشار : خسا الديب قلي ؟؟.
ماكرون: بدنا قطعة أرض على ذوقك نعمل فيها قاعدة عسكرية لفرنسا … وبدنا ياها شرحة ومشمسة.
بشار: بشرفي ما بينعز عليك خيي ماكرون، بس بالله ماضل محلات … لشو تأخرتو لهلق؟؟.
ماكرون: شو ماضل محلات يارجل … معقول ؟؟!!، حواليك صوب الشام هيك شي قطعة نضيفة .
بشار: بشرفي ..وحق الامامو علي خيي ماكرون ، بهي المنطقة بدك تشوف الايرانيين لانو هني اللي مستلمين هالمنطقة.
ماكرون: طيب صوب الجنوب ..درعا، السويدا وقريبة ع الجولان ؟؟.
بشار: بشرفي يا صاحبي بهي المنطقة بدك تشوف الاسرائيليين …
ماكرون: لا إله إلا الله …. طيب شي قطعة بالغرب مطلة ع البحر ؟؟.
بشار: ياخيي كل شي إلا البحر ..بدك تعلقني مع بوتين … هاد والعياذ بالله مجنون ما بينعلق معو … قسما بالله بيعلقني من بيضاتي.
ماكرون: طيب شي قطعة بالشرق بالشمال هي اللي بتسموها الجزيرة يكون فيها شوية نفط ع القليلة ..؟؟.
بشار : هههههههههههه والله بدك تشوف الأمريكان.
ماكرون: شو حالك سديتها بوشنا من كل الجهات … معقول ماضل محل نعمل فيه قاعدة النا.
بشار: بالله ماضل … بتعرف انو بحبك ومارح اكذب عليك، بس لسا في ادلب اذا بدك … بيصير فيها صوب سراقب جبس بيجنن شو رأيك ؟؟.
ماكرون: شو جبس ما جبس … هلق معقول نعمل قاعدة منشان الجبس … تاني شي خيي مو ادلب اللي بعتت عليها كل المسلحين ؟؟.
بشار: المسلحين ما تاكل همن ..هدول جماعتنا .. بس تتكل ع الله منخبرهن وبيمشي الحال.
ماكرون: لا خي لا … بدك تعلقني مع السلطان اردوغان … ؟؟ طيب بالقرداحة ..خيو مناخد بالقرداحة ومنو منكون قريبين من قبر والدك .
بشار: بالله ما بينعز عليك … بس حتى قبر الوالد أخدوه الروس …