متيجو احكيلكو شوية عن فوائد الاغتصاب وايه هو الاغتصاب من وجه نظري كهند مبدئياً كدة انا مكنتش مضطرة ابدا أشارك اى حد حياتى الشخصية لكن كنت بالشجاعة الكافية أنى اعمل كدة بدون خوف أو تراجع وكتير منكم كان يعرف عنى القليل وكلو فاكر انكم عرفتم كل شي عنى احب افاجئكم واقولكم انكم للأسف لسه متعرفوش عنى ولا شي كل إلى عرفتو مجرد 1% من حياتى والحال سيبقي على ما هو عليه
الاغتصاب بقا إلى كلكو فاكرينو بس ممكن يكون اغتصاب جسدى ده للأسف ومن وجه نظري المتواضعة غلط ومش صح الاغتصاب له أشكال كتير غير الجسدى
الاغتصاب هو انك ممكن تبقي ماشية فى الشارع وواحد هياكلك بعينه وبيبص على مؤخرتك أو صدرك وبيسمعك كلام جنسي بحت ومتقدريش تمنعية علشان لو فتحتى بوقك ممكن يجيب كل الحق عليكى وعلى فكرة ممكن تكونى محجبة أو لابسة النقاب عادى وده بيحصل برضو
الاغتصاب هو انك ممكن تكونى بتشتغلى فى مكان خاص ومديرك يتحرش بيكى جنسياً ولو امتنعتي يرفدك عادى وماتخديش مرتبك إلى تعبتى فيه
الاغتصاب هو انك تحبي واحد سنة ولا 3 ولا 7 ولا 10 وتستنيه لحد ما ربنا يوفقو فى شغلانة علشان تتجوزو ولما ربنا يفتحها عليه يسيبك عادى ويأخذ غيرك
الاغتصاب هو أن بنت تتربي فى بيت ابوها وأخوها وعمها وخالها بيتحرشو بيها ومش قادرة تتكلم علشان متترميش فى الشارع
الاغتصاب هو أن يجى واحد يقولك بحبك علشان يفضل ياخذ فى مرتبك أو ينام معاكى بدافع الحب الكبير ده وفى النهاية يرميكى ويقولك أصل انتى زي ما عملتى معايا هتعملى مع غيري
الاغتصاب هو انك تتحرمي من دراستك من بيت اهلك علشان يجوزوكى وانتى صغيرة فيكسرو طفولتك ويكسروكى للابد
الاغتصاب هو انك تتحرمي من أبسط حقوقك كطفلة ويتم ختانك بناء على رغبه اهلك مش رغبتك انتى
الاغتصاب هو انك تبقي ماشية فى الشارع أو سايقة عجلة ده لو عرفتى تسوقيها ويجى واحد بعربيتو يخبطك ويوقعك علشان شايف من وجه نظرو أن سواقة العجل للبنات حرام
الاغتصاب هو انك متعرفيش تدافعي عن نفسك جسدياً لما يجى واحد غريب فى الشارع يضربك لمجرد انك بتدافعى عن نفسك أو اخوكى أو ابوكى
الاغتصاب هو انك تكونى بنت ملكيش اى حقوق غير انك تاكلى وتشربي وتنامى وتنكسر كل أحلامك وطموحك لأن فى حد مسيطر عليكى مادياً ومعنوياً وجسديا
الاغتصاب هو انك تنتهكي انتهاك كامل من كل حقوقك كانثي لمجرد أنك قلتى لا للغلط ودافعتى عن نفسك
إلى كتبتو فوق ده كان 10 %من الرسايل إلى جاتلي من بنات بيشتكو من الظلم إلى اتعرضولو انا لو نزلتلكم كل الرسايل إلى جاتلي من بنات مغتصبات من حبيبها وخطيبها وابوها واخوها وخالها وعمها وغيرو كتير هتغيرو فكرك تماماً وهتراجعو نفسكم مليون مرة لأن البنات دول سكتو وعاشوا عادى اه ميتيين من جوا بس لو تشوفو ضحكتهم عمركم ما هتتخيلو حجم الهم إلى شايلينو كلهم كانو بيشجعونى وواقفين جنبي اه صحيح فى الخفا علشان مش قادريين يتكلمو لأن انتو ظلمة ومبترحموش بس انا عمري ما هكون زيهم انا اشجع من بنات ورجالة كتير واقف فى عين البجح وافعقهالو لأن إلى ربانى راجل
فوائد الاغتصاب بقا كتييير بس كفاية أنها بتجعل من اى بنت قوية وتقدر تواجه اى ظرف وتتحمل اى ضغوط حياتية وبتخليها كمان باردة وبتبص لمستقبلها ومبتسمعش كلام حد وكمان بيخليها دقيقة فى خياراتها الحياتية أكتر
أتمنى أن مفيش بنت تشوف إلى انا شوفتو حتى لو كانت ضدى أو قالت كلمة تجرحني اه الموضوع بيكسر وبيقهر بس الشاطرة والقوية بس هى الى بتطلع منو بأقل الخساير وانا الحمدلله انسانة قوية جداً وباردة جداً ورجعت لحياتي زى الاول وأحسن كمان بل أنى اتعلمت أن فعلآ وقت الشدة هعرف مين حقيقي ومين مزيف وحقيقي بشكر اى ظرف حتى لو كان صعب ظهرلى ناس كتير قوى فى حياتى وبشكر كمان الناس الكتير إلى وقفت جنبي انا مكنتش متخيلة الكم ده حقيقي
دمتم على قد نواياكم يا بشرييين
Hend Shagie
متيجو احكيلكو شوية عن فوائد الاغتصاب وايه هو الاغتصاب من وجه نظري
