قصة و حكمة من زياد الصوفي..106

الدليل التجاري السوري كله باسم مخلوف

من المعروف في سوريا، إذا صار أي شي و راد النظام ينشرو و يخبر الناس عنو، بتلاقيه انتشر متل النار بالهشيم لكترة المخبرين بالبلد، أما إذا صار شي و تاني نهار ما حدا حكي فيه، فتأكد تماما أنو بحياتك ما رح تسمع عنو، لأنو النظام هوة الأشطر بأخفاء الحقايق و تشويهها..

حكاية اليوم عن عيلة مخلوف، هالعيلة اللي دائما كان يقدمها مخبرين النظام على أنها عيلة الها جذور ممتدة بالأرض و الحقيقة غير هيك تماما..

فهية عيلة لا بتزيد قذارة عن عيلة الأسد و لا بتقل عنها إجرام، و الحكاية اليوم رح تخبركون ليش..

قصي شب من حماة و من عيلة ميسورة و مقيمة بالرياض من زمان كتير..

لما انهى البكالوريا سنة 97 قرر دونا عن رغبة والدو بالرياض أنو يرجع يدرس بجامعات سوريا..

عدل البكالوريا و سجل هندسة مدنية بجامعة البعث في حمص..

الشي اللي ريح والد قصي، أنو أخوالو بعدهون مقيمين في حماة و رح يديرو بالهون عليه و يراجعوه اثناء أقامتو بحمص..

بيوصل على حمص و والدو باعت معو سيارة بورش بوكستر موديل سنتها..

شب أول طلعتو مبسوط بحالو و عم يعيش شبوبيتو متل ما بدو..

بس ما كان عرفان شو ناطرو..

بيحمول حالو بعد بكم يوم من وصولو على سوريا و بيقرر يزور صديق عمرو نوار بالشام..

نوار بيتو بهداك الوقت صوب جامع بدر مقابيل حديقة الجاحظ و بيطل على الاحياء الراقية لأبو رمانة و المالكي..

هالبورش السودا بنمرتها السعودية واقفة تحت البيت، لما بيرن جرس بيت نوار..

شب طويل عالباب بيقدم نفسو بلهجة ريف الساحل: أنا محمد الأسعد، هنت صاحب السيارة الواقفة برا؟؟

ايه معلم و صاففها منيح، ما بعتقد سادد على حدا..

لا لا يا حبيب، سيارتك متل الفل أفيها شي، بس الأستاذ رامي مخلوف عجبيتو و بدو يشتريها منك..

والله يا أخ محمد السيارة مو للبيع أبدا..

ما قلك الأستاذ رامي مخلوف و الدفع كاش..أبتفهم عربي يعني؟؟ خود حقها أحسن ما تعمل حادث تخسرها للسيارة..

لما رفض قصي تهديدو المبطن لهالفدان،بيودع نوار و بيحمول حالو و بيرجع على حماة عند بيت خوالو بعد ما مر على حمص و أخد معو صديقو بالجامعة رامي..

على دفى صوبية المازوت ببيت أهلو بحماة، و الأراكيل شغالة، بيرن جرس الباب الساعة تلاتة الصبح..

نوار من الشام واقف عالباب، و الدم و الكدمات معباية وجهو و عم يعتذر من قصي و يقلو: ما تزعل مني الله يوفقك، بس جبروني دلهون على بيتك هون، و ضليت أكول قتل كل الطريق من الشام لحماة..

و وينهون هالكلاب هلأ؟؟

ليكهون ناطرينك تحت على باب البناية..

أبو طوق عضو القيادة القطرية كان ساكن بنفس بناية قصي، و واقف معهون جوا المفرزة اللي عالباب ببجامة النوم عم يقلهون: أهلا و سهلا بالشباب، هلق بينزل هالكلب و بتاخدوه معكون..

تلات شباب متل الخنازير من بينهون محمد الأسعد و أخوه غاندي و واحد تالت اسمو أبو علي بسيارة جيب ملهيين مع الأمين القطري أبو طوق لبين ما يستلمو قصي..

قصي و نوار و رامي، و تلات خنازير معهون بيركبو بهالجيب و خنزير رابع بيركب بالبورش و بوجهون عطريق الشام..

بينزلوه لنوار بنص الأوتوستراد بعد ما صار قصي يترجاهون أنو هوة ما ألو علاقة و اللي بدكون ياه عملكون ياه و وصلكون لعندي..

عند مفرق جرابلس، كانت الساعة صارت شي خمسة الصبح، بتاخود الجيب طريق فرعي و بيدخلو بهالصحراء..

نص ساعة سواقة جوا الصحراء، بتوقف السيارة و بينزلو هالكلاب و معهون قصي و رامي..

عرف قصي و رامي أنو اجت نهايتهون، و خصوصي لما هالفدادين نزلو من السيارة و معهون رشاشاتهون..

بيبدا الضرب و البوكسات و الدحل بالرمل، و بيشلحوهون كنادرهون و جزادينهون و بلوزهون، و بيتركوهون مرميين بعز البرد بدون أي شي الساعة ستة الصبح بصحرا حمص..

لما بقلك أنو الأستاذ رامي مخلوف بدو السيارة يا حيوان، حتى تفهم من هلق و رايح و لا توجعلنا راسنا..

هلق رح نعطيكن آخر فرصة لتعيشو، أركضو و انفدو بجلدكن و اللي باتصيبو رصاصة الله لا يرحمو، و اللي بينفد منكن أبقا بدي شوفو بسوريا الأسد..

بيبدا الركض و بيبدا الرصاص من تحت رجليهون، لحد ما اختفوا ورا صخرة كبيرة و قعدو يسمعو الجيب كيف عم تنسحب من الصحرا تاركينهون وراهون..

ضل قصي و رامي للضهر ناطرين ورا هالصخرة، و هنن بحالة من الجمود و الخوف و ما مصدقين هالفيلم اللي صار معهون..

بيقررو يمشو ليوصلو للشارع العام و هنن مزلطين من فوق و حافين من تحت..

بيوقف باص هوب هوب و بعد ما اترجوه يطالعهون بدون مصاري، وافق على مضض و أخدهون على حمص..

لما نزلهون للشباب قدام فندق حمص الكبير، بيطلعو عند زاخر ابن أبو زاخر الخطيب المسؤول الكبير اللي اتبهدل بيوم من الأيام على أيدين النظام و خلوه يهج برا سوريا، و من معرفة و خبرة أبو زاخر بهالنظام النجس، نصح الشباب بمغادرة البلد فورا..

بيعطيهون شوية تياب و شوية مصاري ليوصلو على بيوتهون..

رامي بيرجع عالقرابيص و بوجهو عالكويت تاني يوم..

و قصي، بيرجع على حماة و بنفس الليلة بيشوف حالو على سفريات العالمية في ساحة العاصي عم يحجز كرسي لرجعتو عالسعودية..

و نوار بيترك الشام بعد بكم يوم و بيلحق بقصي عالرياض..

تلات شباب متل الورد، خسرو منشان كلب وضيع اشتهى سيارة، أبو العين الضيقة سليل الحسب و النسب المخلوفي، و خسرهون مستقبلهون و تعليمهون..

الحكمة:

متحججين بتأييدكون لهالنظام بجماعة النهي عن المنكر و الأمر بالمعروف..

ايه شياطين الأرض أهون علي من بيت الأسد و عيلة المخلوف..زياد الصوفي – مفكر حر؟

About زياد الصوفي

كاتب سوري من اللاذقية يحكي قصص المآسي التي جرت في عهد عائلة الأسد باللاذقية وفضائحهم
This entry was posted in الأدب والفن, ربيع سوريا. Bookmark the permalink.

Leave a Reply

Your email address will not be published.

This site uses Akismet to reduce spam. Learn how your comment data is processed.