قصة و حكمة من زياد الصوفي … 111

القصة:

شبيح اللاذقية فواز الأسد عم المجرم بشار

لما بتكتبر المصاري بايدين الشبيحة بيوصلو لمرحلة ما بقا يعرفو شو يعملو فيها.. الاكيد انهون ما بيوزعوها للفقرا, و الاكتر تاكيدا انهون ما بيتبرعوا فيها للجمعيات الخيرية..

فواز الاسد و فقط من اعمال التهريب و النصب و الاحتيال, جمع ثروة لا يستهان فيها ابدا , و جهلو المعروف لكل الناس ما كان بيخليه يوسع ثروتو اكتر من خلال تبييضها بأعمال انسانية او بالطريقة التقليدية لتبييض الاموال..

بعرف انو ما حدا فيكون اشتقلو لفواز, و لا حدا اشتاق لقصص فواز..

بس حكاية اليوم بتشرح كيفية تعاطي الشبيجة اللي بأغلبهون جاهلين مع ثرواتهون, و بتشرح عن فكرهون الاقتصادي بتوسيعها..

الجكاية بتبدا بصيف 1996, لما وعي فواز الاسد الصبح و شاف عندو من المال المخزن بيكفي ميزانية خمس محافظات بسوريا, فقرر الاستثمار بهالمال..

طلب النصيحة من الاقتصاديين المحيطين فيه من أمثال دحروج الدردري, ابو الغضب العمادي, و مغيروني النحاس.. و ارتأى بعد المشاورات أنو يشتري باصات صغيرة و يأجرها للمهربين مقابل مية الف ليرة بالشهر..

و الخدمة اللي بيقدمها فواز بالاضافة للسرفيس المؤجر, بطاقة بتنحط على مقدمة السيارة لتسيير اعمالها عند النقط الحدودية..

اشترى 150 سرفيس بقيمة مليون ليرة للسرفيس الواحد, و عرضهون للأجار..

كل أفرع الامن و الشرطة و الجمارك و الهجانة بيعرفو من حلال هالبطاقة المعلقة عالقزاز القدماني لمين هالسيارة و الشاطر اللي بيوقفها..

خط التهريب بهديك الايام اللي كان مسيطر عليه فواز هوة خط لبنان- سوريا و العكس, و فتح يومها خط باب الهوا لتسهيل حركة المهربين الجدد..

ابو جمال شب من اللادقية متزوج و ساكن مع مرتو و عيلتو ببناية قديمة عالكورنيش الجنوبي ورثها عن والدو, و فاتح محل صغير بكراج البناية سمانة ليسترزق منها بعد الضهر..

قرر ابو جمال و بسبب الضيقة المالية أنو يستأجر سرفيس من سيارات ابو جميل و يشتغل فيها على خط الللادقية – الحفة..

يعني الزلمة لا بدو تهريب و لا شغلتو هالشغلة و لا بدو يدخل بهالمتاهة مع قطاعين الطرق من القرداحة و ريف جبلة..

وقع العقد مع فواز لسنة كاملة و عطاه 100 الف ليرة و بدي شغلو على خط الحفة..

بأحسن أيامو ابو جمال و بعز دين الصيف ما يقدر يطالع 30 الف ليرة.. يركض ليل و نهار و ما يقدر يلم المية الف ليعطيه ياها لأبو جميل..

كل شهر يمر على ابو جمال كانت دينتو تكبرو ما يقدر يسدد لفواز اجار الشهر..

ست شهور مرت , و بنص الليل و بعد سكرة طويلة عريضة لهالفدان بيرجع عالمكتب و بيصرخ بكلابو: 

مين اللي ما عم يسدد اجار الباصات؟؟

والله يا معلم ابو جمال الو ست شهور ما دفع اللي عليه..

ايه جيبوه لهالكلب فورا..

والله بيركضو خفافيش الليل و بيجيبوه لأبو جمال موجودا عمكتب فواز.. 

شو ولك جحش, بدك عزيمة حتى تجي تحاسبنا؟؟؟

و الله يا سيدي خجلان منك ما عم اقدر طالع الاجرة و بدي رجعو للباص.. و المشكلة يا سيدي ما عندي مصاري منشان حاسبك عن الست شهور الماضية..

كان فواز بعقلو وقتها و جن عالآخر, بيقوم من ورا مكتبو و بينزل قتل بابو جمال..

شو ماتقول يا حيوان؟؟؟ ما عندك مصاري؟؟؟ و هالبيت اللي قاعد فيه, مانو مصاري؟؟؟؟ خدوه لهالكلب عالسجن..

فواز متل كل شبيحة بيت الاسد عندهون سجونهون الخاصة, و اللي بيدخل عليها بيحكي أنو سجن تدمر يعتبر ميريديان بالمقارنة معهون..

بعد شهر كامل من قعدة ابو جمال بسجن ابو جميل, بيتذكرو فواز و بيأمر يطالعو..

روح و لك جحش جيب عقد بيتك و ارجع لعندي..

بس يا سيدي وين بدي روح انا و اهلي؟؟ 

هودي مشكلتك يا حيوان؟؟

ابو جمال يومها كان مديون بمليون ليرة لفواز الاسد, و عقد بيع البيت اللي بيسوى يومها خمسة مليون, كان بس بمليونين و نص..

فهون كان لازم أنو فواز يعطيه مليون و نص لأبو جمال..

ضل ابو جمال واقف شي نص ساعة ناطر فواز يناولو المليون و نص… و بدل المصاري اجتو المفاجأة لهالمسكين..

رح جددلك عقد السيارة سنة تانية يا ابو جمال, هنت انسان فقير و انا رح ساعدك, و بدل ما تدفعلي 100 الف بالشهر, ادفعلي بس 80 الف… يالله قوم اتوكل عالله و اشتغل..

سنة تانية مرت و بنفس السيناريو تماما خسر ابو جمال المحل اللي فاتحو تجت البيت و اللي كانت تشتغل فيه مرتو..

سنة 1999 و بعد ما ضاقت الدنيا بأبو جمال و خشر كلشي من ورا سيارة هالكلب فواز قرر عطريق صلنفة يحطلها لهالسيارة بنزين و يشعل النار فيها, و ينتحر برصاصة براسو..

الحكمة:

تنذكر و ما تنعاد باللعب مع مجرمين بيت الاسد الكبار…

نهايتك اما القتل أو السجن أو الانتحار …زياد الصوفي – مفكر حر؟