ولك اصحوا بقا، يقطع عمركون ما اغباكون..

الصواريخ اللي نزلت اليوم في المناطق ذات الأغلبية العلوية باللادقية، ما بتبعد الا بضعة أمتار عن بيت فواز الاسد و اخوه منذر، و عن فلل اولاد عمهون هلال و هارون و هائل، و عن بناية أبن عمهون التاني كمال و أولادو سامر و ايهم و علي ، و سنتمترات عن قصور اخواتهون فلك و عبير ، و عن بيوت صهوراتهون بو علي شاليش و أيمن جابر..

سقطت الصواريخ بعيدة أشبار قليلة عن بيوت ال الاسد الفاضية بالمناسبة من سكانها..

كلامي بهالبوست موجّه للعلويين من سكان هالمنطقة..
فواز و منذر في بيروت..
هارون و هائل في دبي..
سامر و ايهم و ابوهون كمال في موسكو..
علي ابن كمال في دبي..
فلك في القاهرة..
عبير في لندن ..
بو علي شاليش في قبرص..
أيمن جابر في دولة الضاحية الجنوبية..
هلال عم يجهّز جيش الدفاع الوطني للانقضاض على بيوتكون لسرقتها باللحظة اللي رح تهربوا منها كما فعل في حمص..

مين بقي في المربع الأمني من آل الاسد الا أشباح ال الاسد و انتو ايها الأغبياء ،انتو و الأشباح و بس..

كل رهان هالعيلة عليكون ، ان انتصر النظام رح يرجعوا من أماكن لجوءهون على ظهور الدبابات اللي ماتو ولادكون فيها و هنن على يقين انو الآلاف منكون رح يكونوا في انتظارهون على مدخل البلد مهللين لعودتهون من خطوط جبهة شواطئ دبي و من حواجز ملاهي لندن و من متاريس كازينوهات بيروت.. و ان انتصرت الثورة رح يضلّو منتشرين في عواصم العالم عم يتفرجوا على مصيركون الأسود عبر القنوات المغرضة والمشتركة في سفك الدم السوري..القنوات اللي بالي بالكون الله يجيرنا..

ايمات رح نسمع علسانكون..
ولادنا ما أرخص من ولادكون..
ولك اصحوا بقا، يقطع عمركون ما اغباكون..