Salwa Zakzak
بتعرفو الجورة الصغيرة كتير تحت مسكة غطا المجرور..القطة بتشرب المي المجمعة فيها وبتشبع…
بتعرفوا انو العصافير بتوّقت عطشها لخلص سقاية ورداتي وبتجي بتشرب من الصحن وبالدور وبدون مطاحشة..
بتعرفوا انو مبارح في حدا لقى جنب الحاوية علبة دبس بندورة وزنها ٤ كيلوحقها كومايات وكيس شعيرية ٢ كيلو..وطلع خالص وقتن من شهر كانون الأول ٢٠١٧..قلتلو للزلمة دخيلك لاتاكلون..طلع في وقلي انت بتعرفي شو تاريخ المواد يللي منشتريها فرط وبالوقية او بالمية…وعطاني محاضرة عفترة الأمان يللي بتتجاوز ست شهور وانو البندورة بس تشوف الشمس بتتعقم وبتصير تازة… وانو يللي مخليهن عندو ليخلص وقتن ويكبهن قديش عندو فائض ومقفل عليه.
بتعرفوا انو في ناس ناطرة رمضان للتجارة وهف مصاري العالم..مبارح الخضرة أسعارها دبل..قدامي ناس عبوا كياس وبس عرفوا السعر تركوها ومشيوا….
مبارح وحدة بالسرفيس عم تشكي وعالموبايل وبصوت عالي انو بتنكسر برمضان من دفع كفارة فطور بنتها وزوجها يللي ما بيصوموا…
وفي ناس بتجيب الأسوأ والأرخص للأفقر…ياعمي خليهن يعيدوا والرز المفرفد مو متل صبة الباطون..وبعدين بتنفشوا ريشاتكن وبتقولوا فاعلين خير..
العطاء مو بس مرتبط بالكتمان…بالاحترام والإنسانية كمان…
ورمضان كريم……
