هالنوعية من الناس

Eiad Charbaji
 ما بعرف ليش انا خص نص بتطلعلي هالنوعية من الناس.
باعتلي واحد يبدو كان عميراقب صفحتي صرلو يومين، انو ليش ما عايدت المسلمين بالمولد النبوي، وهل هذا موقف مقصود مني لإنو علماني، أو لإنو مالي مقتنع بنبوة محمد.؟
بلعتها ورديت عليه انو انا عادة بعيد المسلمين وغير المسلمين بكل مناسباتهن وما عندي مشكلة بالموضوع، لكن صدف مبارح انو كان ذكرى استشهاد أخي، ونعيتو على صفحتي وكنت حزين بهالمناسبة، واليوم فقنا من الصبح على اخبار مايك فلين وترامب وانشغلت بمتابعتها كونو هاد صميم شغلي، وهذا فعلا ما حصل، وهذه هي القصة بدون ايدين ورجلين واستنتاجات.
بس يبدو الأخ كان فايت بس ليلقط علي ممسك أو يأفحمني، فقلي انو معقول ما زاد معك وقت لتكتب ولا بوست من كلمتين، وقعد يضربلي امثلة بافخاي ادرعي وبالقس ما بعرف مين انو هنن من غير دين وباركو، وانو شفت كيف انت بكره الاسلام ونبي الاسلام، ولو انك بتحب النبي كنت تذكرتو قبل ما تتذكر اخوك حتى.
هون فقعت معي وقلتلو انو طبعا بدي اتذكر أخي قبل ما اتذكر النبي، أخي من لحمي ودمي وبعرفو وبحبو، بس النبي رغم الاحترام لا شفتو ولا قابلتو لحتى يصير في كيميا بيناتنا وحبو واشتاقلو متل مالي مشتاق لاخي.
هون كإنو عطيتو مليون دولار وربحتو الرهان، وبعد ما لطعني دزينة محاضرات تبع انا تغيرت وانخدعت بالغرب وطلعت من جلدي وشوف النبي شلون عفى عمن اذاه وشو قال عنو فاندام والمستشرق ما بعرف مين وغيرو وغيراتو، بلش بعدها يشرحلي كيف انو النبي أغلى من كل شي بحياتو، وانو بيحبو اكتر ما يحب امو ومرتو وولادو،، هون طلعت معي هيك بصراحة:
انك تحب شخص مالك شايفو بحياتك بغض النظر مين هوي اكتر من ابنك انت يا أما كذاب وهو الغالب، او ان كنت صادق فأنت بحاجة لعلاج سيكلوجي وعاطفي.
وبعدين بلش الياحيف والتفوو والله يحشرك مع من تواليهم….. وهيك.
شو رايكن بهالقصة، وكل عام وانتم بخير