Salwa Zakzak
نهفات المتسولات
سيدة خمسينية واقفة عباب الصيدلية ومعها وصفة وعم تقول ابني محتاج هالدوا..اجا واحد مفذلك قلها كامشة الوصفة بالمقلوب،ردت عليه وقالتلو لو اني دكتورة وبعرف انكيزي ما كنت شفتني هون وقدحتو مسبة قد راسو…
كمان متسولة عباب الجامع ومعها وصفة وعم تقول ابني معو صرع وبيموت اذا ماجبتلو الدوا..كمان واحد مفذلك مسك الوصفة وقلها هادا دوا التهاب وللمفاصل مو للصرع…كمان قدحتو مسبة قدو، وترى هو مترين بمترين.
عزيزتي المتسولة اختصاص وصفات طبية..روحي عأقرب مشفى وعملي دورة بمسك الوصفة وتفاصيلها بعدين وقفي عالبواب…المفذلكين كتار وكلو صحيانلك…والله
…………..
حاوية كبيرة جنب مشفى خاص وفخم .شب عم يسحب من الحاوية العلبة البلاستيك الموصولة بمفجر الجرح…صرخت فيه دخيلك لاتشيلا مليانة دم وبيجوز مجرثمة…طلع في وقلي وانا شو دخلني بالدم..انا بدي بس البلاستيك..والمعلم بدو منن كتير لأنو بلاستيكن ممتاز….
يارقابة! يا وزارة الصحة! يا دكاترة!يامدير المشفى!وين الحاويات الخاصة تبع النفايات الطبية؟ وين عوامل الأمان والسلامة؟
القصة مو هون.القصة انو الشب قللي يعني من كل عقلك رح نموت من كم نقطة دم؟؟؟
سلوى زكزك