نعيت الثورة و أعلنت موعد دفنها كمان

لا ثورة في سوريا خلال أشهر قليلة..

ما بعرف اذا ميشيل كيلو صاحب هالتصريح غيّر كنيتو و صار ابن الحايك، او يمكن هوّة أبو العرّيف و كان وقت الحادثة..

مقال طويل عريض عم يتهّم فيه الإئتلاف بالتخاذل، و أعضاء الائتلاف بالخيانة ، و بتحميل هالمؤسسة الهشّة الهزيلة ، مسؤولية ضياع القصير و حلب و الرقة و الدير و النبك و غيرها..

لو فاز موفق ميربية مرشّح السيد كيلو برئاسة الائتلاف بدل من البحرة ، كان فنجان قهوة الكيلو اللي عم يقرا منّو الفال اتغيّر ، و الكف اللي عم يكشف الطالع منّو اتبدّلت تشكيلات خطوطو، و صارت مؤسسة الائتلاف مؤسسة وطنية و كل الحق باللي صار من إخفاقات بيوقع على المجتمع الدولي الملتهي بالفوتبول..

لا يعنيني الجربا و لا البحرة و لا الائتلاف و لا كل من يعمل بالسياسة،و ما عم دافع عن حدا، و لكن انو شوف رئيس اكبر الكتل المؤلفة لهالمؤسسة عم يرمي الثورة بسطل الزبالة لمجرّد خسارة كتلتو مقعد الرئاسة، فهاد الشي اللي ما ممكن ينسكت عنّو..

بدك تسرق ولا خي ، ما حدا كامشك..
بدك تركب عالسلطة، الله يهنيك..
بدك لقب في المستقبل ، من عندي و من عيوني بتاخدو..
بدك تحتفظ لنفسك بمقعد دائم على شاشات التلفزيون و تحكيلنا قصة الطفل و العصفور ، عندي معارف بالإعلام بحكيلك معهون..

اما انّك تحكي كلمة عن الثورة مع كل الشوائب اللي عم تمر فيها!!! و اللهي يا كيلو لو صرت من فئة الطن ما رح مررلك ياها و لا رح اسمحلك..

مناضل سابق ،على عيني..
معتقل سياسي سابق، الحمدالله عسلامتك..
معارض تاريخي للنظام ، شي بيرفع راس ولادك..

بس بما انك نعيت الثورة و أعلنت موعد دفنها كمان ، انا رح قلك سلفاً قبل ما تجي و تقدّم واجب العزاء :
ممنون تعزيتك ، و شكر الله سعيك، و انشالله منشوفك مع نيشان بحلقة راس السنة الجاية مع توقعات جديدة و قراءة فلكية مثيرة..
و فشرت ماغي فرح..

الله يستر كبرتنا بس..