Eiad Charbaji
كل يوم والتاني حدا بيبعتلي عالخاص أو بيعملي منشن على فيديو أو صورة، على شو عملو البلجيكيين بالكونغو بزمناتهن كرمال المطاط، وجرائم الفرنسيين بالجزائر، والامريكيين بالهنود الحمر، والإسبان مدري وين والطليان مدري وين…. انو تعا شوف هدول جماعتك واحبابك اللي بتدافع عنهن.
اي نعم… ساووني الناس زومبي وآكل لحوم بشر لإنو عم إلفت النظر للتجربة الغربية في الحريات والديموقراطية واتمناها لناسنا وبلادنا… يبدو المطلوب لازم قول انو نحنا خير أمة احسن البشر وفظيعين ونحنا اللي عمنصدر الاخلاق والقيم للعالم، والغرب كفار واحفاد قردة وخنازير وعباد الصليب ونسوانهن شراميط ورجالهن خنازير، وكل شي حلو عندهن هو مجرد كذبة وراها مؤامرة وموساد وماسونية، هدفها النيل من حضارتنا وديننا الذي يريد نشر السلام والعدل والمساواة في ربوع الكوكب.
… يمكن وقتها بس بيصيرو الناس يترضو عني ويقولو اني منظوم…. والغريب بل المفزع انو اغلب اللي بيعملولي هالتاغات والمنشنات شقو حالهن ليوصلو للغرب ويعيشو في ظل الشي اللي انا بمتدحو في تلك البلاد….اي نعم، ولا حول ولا قوة إلا بالله.
