من مفرق شنشار لربلة 18 كم في 13 حاجز ماعدا الحواجز الطيارة للفرقة الرابعة

رسالة من ابن قرية ‫#‏ربلة‬ ( بالقرب من حمص مشهورة بدير مار الياس ) يشكو فيها فساد الحواجز بانواعها الثابتة و الطيارة و الفرقة الرابعة ، اما من معين لهذا الشعب ؟
انقلها لكم كما وردتني :
انا من ضيعة ربلة نحنا فلاحين متل كتار من اهل الضيعة فيها كم ازعر وضعاف نفوس بيحتكروا المواد مشان تهريبا عالبنان طبعا بعلم الامن لانو عم يطعميهن المهم مالنا فيهن نحنا بدنا شغلنا يمشي ونروح عاارضنا ونقطف محصولنا في من مفرق شنشار لربلة حوالي 18 كم وفي 12 او 13 حاجز ماعدا الحواجز الطيارة (الفرقة الرابعة) وشو ماكان الواحد جايب معو بدن مصاري لحتى تمرق منعطي اول واحد بيجي التاني بيقول هداك جيش مالي علاقة فيه نحنا امن ماالنا علاقة فيهن طيب المنطقة عنا آمنة الحمدالله بدك تقاتل وتدافع عن بلدك في 100 جبهة حلو عنا بقا عنجد قرفنا نطلع عالطريق هلأ طالعة الفرقة الرابعة جديدة عالخط قال عاحكين بدنا نموتكن الجوع يااهل ربلة طبعا المهرب الكبير بيمرق وبيجيب بضاعة بس الفلاح يلي عم يحوش مشمشاتو وياخدن يبيعن بسوق الهال بدو يجيب معو عبوات بلاستيك مشان يعبيها قال ممنوع عم ينزلوها عالطريق او بيصادروها وبيبيعوها هني الوضع مابقا ينحمل وماحدا بيسترجي يحكي حتى رئيس البلدية والمختار ماشالوا القصة من ارضا بحجة بيطيروهن وبيطلبوهن عالتحقيق طب نحنا عم نتأذى وراح الصالح بالطالح اذا الامن والمهربين مختلفين نحنا شوالنا دخل بيطلعلولنا بحجة انت مهرب طيب يااخي روح سكر حدودك واظبط الحدود بتعرف مين المهرب . المهرب عم يدفع شهرية ماحدا بيحاسبو لك حتى الصيدلي دفع مصاري عاالدوا اللي جايبو من حمص حتى اللي جايب بطبون السيارة شوية اغراض لبيتو مونة بدن ياخدو منن او بدك تعمل ورقة من ستين فرع ومحافظة ومنطقة كرمال تمد ايدك عاجيبتك محلولة الامور حتى اذا اظطر يذل حالو مشان باكيت الدخان بحجة مقطوع من الدخان منتمنى من الجهات المعنية والمختصة تاخد بعين الاعتبار هالموضوع لانو عنجد في ناس مخنوقة ومتدايقة ونحنا ضيعة مسالمة ومؤيدة ودافعنا عن حالنا وانشالله بترجع سوريا احسن من ماكانت والله يديمك وشكرا عاجهودك