من اربع سنين صرختلك لتكون معي سيّد للوطن مع الأسف كنت مستحلي عيشة العبيد

لفتني مبارح مقطع مسجّل عاليوتيوب لأحد سكان مشروع الزراعة باللادقية و اللي اتصاوب بيتو نتيجة سقوط قذيفة عالحي ذو الغالبية العلوية…
بعد ما شرح للمذيعة الحسناء من تلفزيون سما عن الحادث ، ختم بالقول ” كلّو فدا الوطن” ..
الوطن..
و هون بيت القصيد..
عن أي وطن عم تحكي يا شريك الوطن؟؟
رح اكتب هالبوست مو بتشفّي و لا بشماتة، إنما خوف و قلق بانكيموني حقيقي على مستقبل صاحبنا ابو وطن..
رح تنتصر الثورة و رح ينتهي بشار و عيلتو و نظامو، و رح اتفيق يا معلم على غفلة بصباح احد الايام على أصوات الحرية عم تعم شوارع اللادقية ..
ما رح تتحمّل صدى الصوت ، فوطن الحرية ما اتعودت عليه ، و رح تحاول اتشوف مكان اخر الك تمارس فيه مواطنتك الاسديّة ، و رح تصطدم انو هالصوت رح يكون صداه في كل قرنة و زاوية من حواري سوريا..
لوين بدك تنزح ؟؟
على الغوطة!! و تعيش مع اهالي الأطفال اللي وطنك خنقهون بالكيماوي ؟؟
او على حمص !! و تبحث عن مكان تتآوى فيه، و ما يكون دمّروا وطنك ؟؟
او يمكن على حماة!! و تتعايش مع إرث قديم متغلغل بضمائر أهلها؟؟
بركي دير الزوز!! طمعاً بكرم أهلها اللي شرّدهون وطنك..
معقول تكون مفكّر بدرعا !! و بعدو دم حمزة و تامر ما نشف..
و ما تنسى خود معك شوية بقلاوة بايدك لأهالي يبرود او القصير اذا فكّرت بالنزوح لعندهون..
ما بنصحك بالبيضا، و لا بالحولة، و لا ببابا عمرو و لا بالصنمين و لا بكرم الزيتون، فأهالي هالمناطق ما كتير معجبين بالوطن اللي حضرتك فداه ..
لوين بدك تنزح؟؟
بسوريا ما رح اتشوف الك مكان للنزوح..
معقول تكون عم تفكّر باللجوء مثلاً؟؟
لوين !!! لعند ملك الأردن الشاذ متل ما وصفتو؟؟
او لعند بدو الخليج اللي ما وفّرتهون لحظة بوصفهون بأفظع الأوصاف ؟؟
او يمكن لعند السلطان اردوغان عم تفكّر تلجأ ؟؟
او بركي على وادي خالد و عرسال و طرابلس ؟؟
يا صديقي ابو وطن..
حتى على قراكم و ضيعكون ما رح تقدروا تروحوا ، بعد ما بعتوا اراضيكون و خيرات بساتينكون للسيّد الضابط الكبير من ابناء هالضيعة لتصيروا خدم في اراضيكون بعد ما كنتوا أسياد عليها..
و شايف يا ابو وطن هدول السنّة و المسيحيين اللي شاركوك بدعم اجرام وطنك لمدة اربع سنين؟؟؟ شايفهون منيح!! ايه اشبع كتير من هالشوفة النسّة ، لأنّو حتّى هدول ما رح بقا تشوفهون، فكلهون عندهون اهالي بالخليج و بأوروبا و باميركا و بكل دول العالم و رح يهربوا لعندهون بعد ما يسقط وطنك..
قلتلي فدا الوطن !!!!
من اربع سنين صرختلك يا ابو وطن تجي لتكون معي سيّد من أسياد وطننا و تشاركني فيه، بس مع الأسف كنت مسترطب و مستحلي عيشة العبيد، و الله كريم ما رح يرفضلك طلب..