مشكلتهون انهون صدّقوا حالهون انهون سادة في مزرعة اللي خلّفهون

يا سبحان مغيّر الأحوال..
كان الواحد فينا قبل الثورة يقرأ المعوذتين عند فتح باب بيتو و التهيّؤ للبدء بنهار جديد ، مع الدعاء المتلازم مع مطلع كل شمس: يا رب ابعد عن طريقنا شر بيت الأسد ، و خلّي هالنهار يمر على خير ، و نرجع آمنين سالمين حتّى لو مو غانمين الى أهالينا..
شرقت شمس الثورة بهداك اليوم الاسود في تاريخ بيت الأسد ، و تغيرت الأحوال ..
و صار ابن الأسد عند مطلع كل ضو و بدل من حشو دماغو برصاص الجريمة ، و قبل تلقيم لسانو بعبارات اذلال البشر ، صار بيدخل على صفحات الثوار و بيشوف اذا هالليلة مرّت على خير ، و ما حدا حكي عليهون شي..
مين كان ممكن يصدّق اللي عم يصير اليوم من كسر للهيبة الزائفة لآل الأسد ؟؟؟
مبارح على صفحتي كان دور ختيارة الجن ، الداعية فلك جميل الأسد ..
و كانت ردّة فعلها على البوست، كردّة فعل كل أفراد أل الأسد و اللي طالتهون صفحتي يوماً..
طرقتني بلوك متل ما عمل قبلها كل اخوتها و اولاد عمومها و اللي اصابتهون شظايا هالصفحة..
و بدل تكذيب كل القصص و التلميحات اللي رويتها مبارح عن اخلاق و سلوك فلك الأسد ، ردّت علي اليوم ببوست مقتبس عن مقولة للامام الشافعي و عن أهمية عدم الرد على السفهاء..
المشكلة في كل أفراد بيت الأسد انهون كَذَّبُوا كذبة اسياد سوريا و صدقوها ..
مشكلتهون انو ما عم يصدقوا انو هالناس اللي كانت تقطع الشارع مرعوبة لما تشوفهون، صارو بيحكوا عن تفاصيل شرورهم و بتهكّم..
مشكلتهون انو لهلأ ما مصدقين انو اللي كان يخاف من أدانين الحيطان، هدم نفس الحيطان على رؤوسهم ..
مشكلتهون انهون صدّقوا حالهون انهون سادة في مزرعة اللي خلّفهون، و آمنوا انهون حكام الله المختارين في بلد الأنبياء سوريا..
و من هون رح رد عليكي يا سيدة البوتوكس الاولى بقول من أقوال الامام الشافعي نفسو اللي استشهدتي فيه، واصفاً الحياة في سوريا الأسد:
تموت الأسود في الغابات جوعاً … ولحم الضأن تأكله الكــلاب..
وعبدٌ قد ينام على حريـرٍ … وذو نسبٍ مفارشهُ التــراب..