مرصد رامي عبد الرحمن حل عنّا و خلينا نسمّي بالرحمن

نكون حاملين حالنا من الصبح يوم الجمعة و فايقين بكير و آخدين باصات بالآلاف و طالعين على جبلة لنتفرّج على مباراة حطين و جبلة بالفوتبول..
الماتش يكون من أولو لآخرو حطيني، و حطين عم يلعب و عم يضغط و عم يضيّع فرصة ورا التانية ، و جمهور حطين العاطفي عم يلعن حياتو، و عم يلعن اللحظة، و عم يلعن حظّو ، و بأوقات كتير عم يلعن لاعبي الفريق..
وحدو مراسل برنامج ملاعبنا الخضراء الإذاعي كان شايف المباراة بطريقة تانية..
– زميل عدنان : المباراة من أساسها لمحرابها جبلاوية، فرص ضايعة جبلاوية لا تعد و لا تحصى، العارضة حرمت فريق جبلة ست أهداف ، حطين غايب اليوم، لا حس و لا خبر..
عين جمهور حطين على مجزرة إضاعة الأهداف الحطينية، و أدنو عالراديو مع مراسل ملاعبنا الخضراء الكذاب..
اليوم من الصبح فقت على خبر مصدرو المرصد السوري لصاحبو رامي عبد الرحمن و اللي مركزو لندن عم يقول:
إسقاط طائرة سورية فوق مدينة الرقة معقل دولة داعش..
زميل اوباما، زميل اوباما :
طيارة سوريّة كانت مارّة فوق مدينة الرقة لمراقبة المحصول الزراعي ، فقام مقاتلي داعش بإسقاطها بصواريخ محمولة عالكتف، فحذاري يا زميل اوباما من انو طياراتك تطير فوق الرقة، فمصيرها السقوط على ايدي التنظيم ، و الاسد ما الو علاقة بإسقاطها..
مرصد رامي عبد الرحمن ، حل عنّا و خلينا نسمّي بالرحمن..