ما ترك بشار الاسد شي حلو الا تدخّل لافسادو

دعتني زوجتي من شهرين لمتابعة ما وصفتوا يومها بالصوت الأسطورة ..
على برنامج أراب ايدول، وقّف على خشبة المسرح شب وسيم و خجول ، و بيحمل بين ثنايا حبالو الصوتية عصارة الفن الحلبي الأصيل..
حازم شريف شب حلبي هارب مع عائلتو الى بيروت من بداية الثورة ، و على بعد تلات أسابيع فقط من حصولو على اللقب اللي اجتهد للحصول عليه..
تابعتو خلال الشهرين الماضيين ، و لكن اللي لفتني اكتر من عذوبة صوتو ، صفحتو الحديثة على الفيسبوك و اللي فتحها لجذب ناس اكثر للتصويت لصالحو ، و للتواصل مع المعجبين بهدف زيادة فرصة النجاح..
صفحة سوريّة نادرة في زمن كوليرا الفيسبوك اللي عايشينها، صفحة خالية من الأمراض السورية السارية ، و بعيدة كل البعد عن اي اصطفاف سياسي .. صفحة أعطتني امل و لو بسيط انو الفن البسيط قدر يذيب الخلاف و الاختلاف الواقع بين السوريين..
و قبل تلات أسابيع من التتويج باللقب ، كان للنظام و اذنابو رأي تاني..
فجأة و من دون سابق إنذار و قبيل حلقة مبارح ، بيظهر الشبيح القذر قصي الخولي بتوجيه اكيد من احد الجهات الأمنية ، مستغلاً سذاجة حازم الشريف و سعيو الى الشهرة السريعة ، فالتقط صورة معو ، و نزّلها الغر الفني حازم مباشرةً على صفحتو ، ليرجع الانقسام الأفقي و الشاقولي بين تعليقات الالاف من السوريين على الصفحة..
و ما اكتفى النظام بإرسال قصي الخولي لكسر حالة الاستنقاع الوطني في حالة نادرة على صفحة حازم الشريف، بل ابتعد اكتر بكتير بإرسال اربع صبايا ما منشوفهون الا على أغلفة المجلات الفنية ، بقمصان بيض موحدة ، مكتوب كلمة حلب على صدرها ، و مشوهة بعلم بشار الاسد، كخطوة لاسقاط هالحالة الجامعة في مستنقع الاصطفافات السياسية ، و إنهاء هالشي الحلو البسيط اللي كنا عم نتمتّع فيه ، و نتناسى من خلالو سواد المشهد المحيط فيه..
ما ترك بشار الاسد شي حلو الا تدخّل لافسادو، حتى سذاجة هالشاب السوري اشتم ريحتها ، ف خرب عليه اللقب، و خرب على السوريين المتابعين متعة الاستمتاع بالنجاح بعيداً عن المواقف السياسية..
و على قولة اهل حلب بهيك حالات :
وبا يأشّك يا بشار ..