فراس الاسد: فيسبوك
و بقلولك.. يلعن ابو هالزمن يلي صارت فيه الخيانة وجهة نظر..!!!
سرقة أموال البلد… على أساس هي مو خيانة..؟!
ظلم الناس و استعبادهم… على أساس هي مو خيانة..؟!
رعاية الطبقة الطفيلية التي نخرت ضمير و وجدان و أخلاق البلد… على أساس هي مو خيانة..؟!
وقت يوقف المواطن الفقير لساعات طويلة متل الكلب أمام شركات و مكاتب و فنادق و مطاعم و مصانع أبناء المسؤولين طالبا لفرصة عمل أو طالبا لرفع الظلم عنه… على أساس هي مو خيانة؟!
وقت يصير الفساد عرف أقوى من القانون في كل مرافق الدولة من دون استثناء… على أساس هي مو خيانة..؟!
وقت بمر على الدولة عشرات الآلاف من المسؤولين في كل الدرجات… و لا يحاسب واحد منهم… واحد منهم فقط.. على فساده أو ظلمه للناس و التعدي على حقوقهم… على أساس هي مو خيانة..؟!
وقت بضل فلان أو علتان، و على مسمع و مرأى من الناس، و على مدى سنوات و سنوات، يشفط في الشوارع، و يرهب الناس في الشوارع، و يلاحق الأعراض في الشوارع، و يضرب من يشاء و يرغب في الشوارع، و يمرمط بكرامة الدولة و هيبتها الأرض.. في الشوارع، و يأتي بعدادت المصاري و يعد ملياراته.. في الشوارع، و تبقى الدولة و أجهزتها تراقب و أعينها مغمضة…. على أساس هي مو خيانة..؟!
وقت بتهجم عصابة بنات لابسين عسكري على النساء بالشوارع و بتشلحهن حجاباتهن…. على أساس هي مو خيانة..؟
وقت بصير الحربوق، و ابن الحرام، و المكولك، و الديوث، و العرص.. وقت بصيروا هدول هنن أفهم العالم و ما حدا بيندعم و بيوصل غيرهم، و كل واحد عندو شوية كرامة أو رجولة أو عزة نفس أو ذرة شرف بصير عدو…. على أساس هي مو خيانة..؟
وقت يوصل كل مواطن بالبلد لقناعة أنو لازم يبيع كرامته أو عرضه لحتى يكون عندو فرصة متساوية في السلم الوظيفي مع باقي العرصات…. على أساس هي مو خيانة..؟
وقت بصير كل وظيفة الها تسعيرة، هي بدها ميتين الف يا حبيب، و هديك بدها تلاتة مليون يا غالي… على أساس هي مو خيانة..؟
وقت بكون المواطن بيعرف سلف انو كل شطارته بالشغل و ذكائه بالتجارة و عبقريته بالاختراع ما رح يفيدوه شي، و انو بس يقطع حد معين من الثروة سوف يأتي من يشاركه بها، و بيختصر الطريق و بيستثمر كل عبقريته في البحث عمن يشاركه ثروته المستقبلية بأقل نسبة ممكنة…. على أساس هي مو خيانة. ؟
وقت بتصير شغلة الضابط الأمني الأساسية هي مراقبة مداخيل التجار حرصا منه على الحفاظ على حصته غير منقوصة، و شغلته الثانوية في أوقات الاستراحة الحفاظ على أمن البلد…. على أساس هي مو خيانة..؟
وقت حقوق الناس بتميل مع ميلان خصر الصاحبات و العشيقات… على أساس هي مو خيانة..؟
وقت بيتدخل ضابط الأمن في زواج ابنة شريكه التاجر، و هاد العريس ممنوع و هداك مسموح…. على أساس هي مو خيانة..؟
وقت بعيش المسؤول على راتبه تلاتين سنة، و بعدين بقدرة قادر بصير ابنه عبقري زمانو و بيصنع ثروة طائلة، و بيقعد المسؤول يبيض على الشعب انو انا ليكني يا حرام ما عندي غير بيتي و راتبي التقاعدي، و إذا ابني العبقور الفرفور ما ساعدني والله بموت من الجوع، وقت بصير كل ولاد المسؤولين و بقدرة قادر أعبقر و أذكذك و أفطحل رجال أعمال بالبلد، و أباءهم كلهم بموتوا من الجوع لولا شطارة فرافيرهم، وقت يستجحش الشعب بهذه الطريقة، و تأتي مؤسسات و عقارات و أملاك هؤلاء لتملأ البلد و تقلع عيون الشعب الفقير في اليوم الواحد آلاف المرات…. على أساس هي مو خيانة..؟
وقت بتكون ملفات الفساد، و الصور و التسجيلات و الذي منه، موضوعة بالأدراج فقط من باب الاحتياط، و لا تستعمل إلا في حالات خاصة و لمصالح خاصة، و عندما يكون الشعب محروم من الاطلاع على تلك الملفات و الاستفادة منها لمحاسبة المقصرين و الفاسدين و لتنظيف الدولة و بنائها بعيدا عن هؤلاء و قريبا من شرفائها… على أساس هي مو خيانة..؟
وقت بقوم الطالب المدعوم و بيسفقوا كف ﻷستاذه بنص المدرسة قدام كل الطلاب، وقت بشوفوا الطلاب انو ما طلع منها شي، وقت منربي أجيال على احتقار الأستاذ يلي راكض وراهم من محل لمحل ليعطيهم دروس خصوصية لحتى يشبعوا ولادو أكل…. هي على أساس مو خيانة..؟
و قت بكون بدنا مجلدات لنحصي البلاوي و المصائب التي حلت بالبلد على مدى عقود.. و يا دوب تكفي… على أساس هي مو خيانة..؟
أكبر خيانة اليوم انو ما نعترف بلي صار، انو نكابر و نقول مؤامرة، مع العلم المؤامرة موجودة و باعتراف دولي..
بس المؤامرة مو مؤامرة واحدة…. بل مؤامرات!
يعني وقت مجموعة لصوص بيتآمروا ليسرقوا محل مجوهرات… فهي مؤامرة..
و وقت بيقبض الشرطي على اللصوص بس بيتفق معهم ياخد نص المسروقات و يتركهم يروحوا… هي مؤامرة تانية ركبت على المؤامرة الأولى..
و وقت بيكتشف قائد الشرطة الموضوع و بحطو للشرطي بالحبس و بشلحو المسروقات و بحطن بجيبتو…. هي صارت مؤامرة ثالثة على المؤامرة الثانية…
و وقت صاحب محل المجوهرات بيسمع بالقصة من الشرطي بعد ما يطلع من الحبس و بروح بيشتكي للقاضي، و القاضي بقلوا يا حبيب شو شايفني اجدب لحاكملك قائد الشرطة؟!!… هي صارت مؤامرة رابعة ركبت على المؤامرة الثالثة..
و هيك بتركب المؤامرة فوق المؤامرة.. و بيشترك الكل، برا و جوا، و كل صاحب مصلحة، بتركيب المؤامرات يلي بتركب كلها فوق بعضها و كلها بالمحصلة بتركب على ظهر الشعب..
معليش اتحملوا صراحتي شوي..
و إذا في حدا قريب أو صديق صابتوا شي طرطوشة.. معليش سامحونا..
في وطن… عم يلفظ أنفاسه الأخيرة قدام عيوننا..!