مافيا أم نظام ؟؟.

Bassam Yousef

خيو في حدا مابيعرف انو اللي قتل الزعيم “كمال جنبلاط ” هو النظام السوري ؟؟!!.
وفي حدا لسا بيشك انو اللي قتل “رفيق الحريري” لم يكن النظام السوري ؟؟.
ومين اللي قتل “جورج حاوي” و”جبران تويني” و “سمير القصير” …واللي قتل ..وقتل ..وقتل ….ماهوي النظام السوري ؟؟.
تفضلوا شو عملت البشرية كلها من أجل هؤلاء جميعاً؟؟!!.
لما فات النظام السوري على لبنان منشان شو فات ؟؟؟ فات منشان مشروع وطني او قومي او ..او… ؟؟.
فات بالمشرمحي منشان يخلي لبنان ضمن المعادلة المرسومة في هذه المنطقة، أي باختصار منشان ما يسمح للمشروع اللي كان عم يحاول البعض من خلاله تحويل لبنان الى صيغة سياسية اخرى، اي ان يتحول لبلد فيه سلطة وطنية الها مشروع وطني خاص فيها.
كتييير علقنا ببعض نحنا جماعة المادية التاريخية – اللي تبين انو ما النا علاقة لا بالمادية ولا بالتاريخ – منشان نوصّف النظام السوري لنحدد موقفنا منو … مرة نظام لاوطني، ومرة نظام خائن وطنيا، ومرة نظام طائفي، ومرة نظام ذو سمات طائفية ..وكل هاد العلاك المصدي …
كنا نتقاتل ونختلف ونتزاعل ونخوّن بعضنا ونرجع للمقدسات تبعنا ( الفلسفة الماركسية ) وهيك قال ماركس وهيك قال لينين .
أحد أصدقائي واللي كان رفيقي بالسجن، واللي بحبو كتير ، وبعدو بسوريا بيقلي ببداية الثورة خيو انا ضد اسقاط النظام .. ولما اندهشت وسألتو بشرفك انت ضد ..؟؟!!. قلي اي ضد … لأنو انا بدي حافظ على المؤسسات اللي بناها البعث …!!!.
أي مؤسسات … !!. ليش نحنا عنا مؤسسات دولة …؟؟
لا خيو ماعنا، ولاتفنجروا عيونكن جماعة المادية التاريخية وتقولولي انو اذا كانت المؤسسات ضعيفة او لاتقوم بعملها بشكل جيد هذا لايعني انه لاتوجد دولة …..
لا يا خيي ماكان عنا دولة، ولا كان عنا مؤسسات ، وهي بعد سبع سنوات عطوني تفصيل واحد من تفاصيل عمل هذه المؤسسات يؤشر على كونها مؤسسات دولة – مهما تكن – وليست مؤسسات لعصابة .
في جامعة، أو مشفى ، أو قطعة عسكرية ، أو شركة نقل ، أو حتى تواليت عمومي … تصرف طوال هي السبع سنوات الا بصفته مؤسسة تابع بشكل كلي لهي العصابة ؟؟.
نظام بيقطع الكهرباء 16 ساعة عن السوريين وبيبيع الكهربا للبنان والاردن … هاد شو الو علاقة بالمؤسسات ؟؟
نظام بيحول المشافي الى سجون ومراكز اعدام وبيصيروا الاطباء والممرضين بياخدو تعليماتهن الطبية من عنصر المخابرات مو من التقرير الطبي للمريض وم من ضمير المهنة… وبيحول الجامعات لفروع مخابرات … وبتصير المحاكم بازار لقبض المصاري … ومارح احكي عن الجيش والشرطة والمخابرات لانو بعتقد انو مابدها حكي!.
والأخرى من هيك بيطلعلي مثقف ولا سياسي ولا شو بيعرفني وبيقلي هاد نظام علوي …!!.
ياخيي انو نظام علوي وانو نظام بلوط … ؟؟!!.
في عصابة شافت مجموعات ( ذات لون طائفي او قومي او …) مابتعرف الله وين شالحها ..عندها خوف تاريخي متأصل من أطراف أخرى ، فاستغلت خوفها وفقرها وعملت منها مجموعات خانعة مستلبة مستعدة تروح بأمر منه ع الموت … ركبت – هي العصابة – عليها ودندلت اجريها، وحولتها لهي المجموعات لعبيد بيموتوا مجانا وبيقضوا عمرهن بالوهم وهني ساكتين على اساس انو حاميها.
مو بس المجموعات الطائفية ( علوية ولا مسيحية ولا …) … ياخيي تعو نعد المجموعات اللي ركبت عليها هي العصابة بهذه الحجة أو تلك، … المجموعات اللي ضحك عليها انو مقاوم وممانع …والمجموعات اللي صدقت انو بدو الوحدة العربية … ومجموعات اللي صدقوا انو نظام علماني … ومجموعات اليسار اللي صدقت انو ضد الامبريالية … ومجموعات ..ومجموعات …. فصل لكل مجموعة بردعة تناسب عقلها وركب عليها.
اذا بدنا نفهم هاد النظام جيدا … ونفهم كيف بيتصرف لازم نقراه كمافيا، لازم نفهم كيف تفكر المافيات، والعصابات، وكيف تنظم امورها، وكيف تقيم علاقاتها مع الداخل والخارج، وكيف تتعامل مع افرادها وسجونها ومع الجهات اللي تشكل خطرا عليها.
حاج بقى لسا بيحكولي عن دولة … أي دولة وأي مؤسسات … ؟؟.
ياخيي انسوا المعارضين والخصوم لهي العصابة وتفضلوا شوفوا كيف بيتصرف مع من هم في صفه ومن أساس بنيته … مين قتل آصف شوكت وغازي كنعان وخلية الأزمة وعشرات الاسماء اللي كانت من صلب بنية هي المافيا … ؟؟.
مين اغتال الزعبي وعصام الزعيم وكفتارو و..و… ؟؟.
تاني شي مين اللي قلكن انو المافيا مابيكون عندها مؤسسات وبتديرها وفق مصلحتها وبشكل فعال؟؟.
المافيا لديها مؤسساتها ، وبتعمل نظام خاص بها وبتدافع عن افرادها وبتقيم شبكة علاقات منظمة و..و… لكنها بالتأكيد تختلف جوهريا عن مؤسسات الدولة لجهة غاياتها ومن تخدم ومرجعياتها القانونية .
من جهة أخرى معقول لساتنا منتوهم انو الحكومات في اوربا وروسيا وايران و امريكا وتركيا ولا اي دولة فاعلة .. مابتعرف شو عم يعمل هاد النظام من مجازر ..؟؟
لأ وشو بيضحكوا علينا انو بدهن يحققوا ليتأكدوا …. حاج مسخرة ..ولوووه.
مافي حدا بيشتغل بالسياسة مابيعرف جيدا شو هوي هاد النظام …
بيعرفوه مافيا وعصابة قذرة … لاهوي دولة ولاهوي مقاوم ولا هوي ممانع وما هوي الا شلة لصوص …
ما الها زمان قصة اغتيال وسام الحسن بلبنان ، وسام الحسن اللي كشف بالدليل الملموس الوظيفة الاجرامية لميشيل سماحة وللنظام السوري … تفضلوا هي وسام الحسن اغتيل وميشيل سماحة حي يرزق.
ولسا بيطلعلي ماركسي عصري – آخر طبعة – بيشوف حزب الله حركة تحرر وطنية ومقاومة ….!!.
ياخيي شو عمل حزب الله بلبنان … تفضل افتح ملف اللي عملو حزب الله بلبنان من يوم اللي تأسس لهلا وخبرنا …
حرر جنوب لبنان ؟؟ ياخيي كانت قادرة الحكومة اللبنانية ترجع جنوب لبنان باتفاق سياسي افضل بمئة مرة بشروطه من الصيغة الحالية، وفيه احترام للسيادة الوطنية أفضل بكتير.
هلا بينط هاد اليساري وبيقلي شو بيتفاوض مع اسرائيل يعني ؟؟ … ليش يابعدي مع مين موقع حزب الله تبعك اتفاقه … مع جزر الواق واق يعني ؟؟.
عشرات المرات صرح مسؤولون اسرائيليون انهم سينسحبون من جنوب لبنان وقبل ما يخلق حزب الله …
اللي عملو حزب الله بالضبط هو العكس … اجهض فعلا حركة التحرر الوطني اللبناني ومشروعها ، وحول الطائفة الشيعية التي كانت بظروفها الاجتماعية مهيأة أكثر من كل طوائف المجتمع اللبناني الأخرى لكي تكون جزء فاعل وحقيقي في المشروع الوطني اللبناني، حولها الى مشروع لطم بقيادة الولي الفقيه … وجعل لبنان بلدا محكوما من ايران ..هاد اللي عملوا حزب الله .
خيو .. من الآخر ” النظام” السوري لايقرأ إلا كما تقرأ المافيات … قراءته سياسيا وشو بيعرفني ما بيمشي الحال … اقراه كما تقرأ المافيات بتفهمو جيدا … وبتعرف انو مافي حل الا بتحطيمه واقتلاعه من جذوره …
نعم حظنا سيء انو هي المافيا وبحكم طول الزمن – متلها متل كل المافيات – تشكلت حولها فئات مسحوقة ومغيبة تعيش على حوافها وتشكل ما يشبه بيئتها الحاضنة… وبحكم الزمن ايضا ترابطت علاقاتها الى درجة كبيرة مع مافيات اخرى قوية دافعت عنها بشراسة، وفوق كل هذا اجتنا معارضة بتهوي، واجو جماعة “الاخوان المسلمين” وما تفرع عنهم، لا ليحطموا هذه المافيا كما يدعون، بل ليحطموا خصومها بقصد أو بدون قصد.
الله يرحمك يا أنطون مقدسي كنت بتعرف منيح لوين بدها تاخدنا هي العصابة ” ستأتي سنوات صعبة مريرة. والشعب السوري سيدفع أثماناً باهظة إذا هو حاول خلخلة هذه المنظومة الأمنية التي يرتكز إليها الاستبداد ويشرش فوقها.