ماتيسر من كتاب, نهج اللواته

يقود سيارته منفوش الريش كالطاووس, فرحا بصيده الثمين, أمرأه جميله مغناج في بداية الثلاثينيات من عمرها, وجدها وهي ignفي حيره من أمرها, تحاول أن تجد من يساعدها أو هكذا بدت له, وبعد ان نظرت اليه بنظرة استعطاف ذات مغزى دفين!!
وقف وكلمها ثم عرض عليها أن يساعدها ويوصلها الى حيث تريد, فوافقت على الفور,
حالما جلست في السياره بجواره, تغيير حديثها وبدأت تتكلم معه بأريحيه وحريه, فعرف انه وقع على صيد ثمين!!
بدأ يحدثها عن بطولاته ومغامراته, وهي تنصت باهتمام واعجاب شديدين!!
قالت له هل عندك مكان نذهب ونجلس فيه براحتنا؟؟
فأجابها اللوتي: نعم
المرأه: ممتاز, فقط اذهب بنا من ذاك طريق الجديد, كي لايشاهدني ابناء منطقتي معك
اللوتي: حسنا جدا,
بعد ان ساق لدقائق شاهد سيطره ونقطة تفتيش, فقال لها
اللوتي: لاتفتحي فمك سوف اعالج الامر بسهوله فهم جماعتنه وعرف
المرأه: الله يسهل!!
اللوتي: مرحبا أخونه
رجل الامن: هوياتكم ؟؟
اللوتي: هاي هويتي اخويه
رجل الامن: هاي منو اللي وياك؟؟
اللوتي: زوجتي اخويه؟؟
رجل الامن: متأكد زوجتك؟؟ عندك اثبات؟؟
اللوتي: دا أكلك يا أخي زوجتي هاي شبيك؟؟ قابل اشيل عقد الزواج ويايه؟؟ لو تريد اجيبلك شهود؟؟
رجل الامن: لايمعود, لاتصير عصبي, مابيه شي, مبروك!! بس شوكت تزوجت لطيفه رمشلي؟؟ (موجها الكلام الى لطيفه) لطيفه شوكت طلعتي من السجن؟؟ هذا شريكج الجديد مو؟؟ مبين عليه خوش علاس!!
اللوتي: لطيفه رمشلي منو؟؟ ياشريك؟؟ ياعلاس؟؟ دخيلك معود!!
رجل الامن: هاي اللي بصفك!! ليش ماتعرف اسم مرتك؟؟ لطيفه وشهرتها رمشلي؟؟ انزلوا بين مااخابر المركز ياخذوكم, وهناك يجيبولك شهود!!
اللوتي: دخيلك ابو الغيره, اصلا لا أعرفها ولا أعرف شسمها ولا حتى رمشتلها, قبل خمس دقايق شلتها, انسانيه مني
لطيفه: هاي شبيك من طيح الله حظك قبل شويه جنت عنتر!! وتكول عندي بساتين واخويه ضابط جبير بالفرقه الماسيه, وخالتك صديقة مشعان الجبوري!! شو صرت عبله بأول راشدي؟؟ دخابر على ابن عمك مو تكول جان صديق سعدي الحلي؟؟
اللوتي: انجبي واسكتي مو كتلج لاتفتحين حلكج
اللوتي: دخيلك عيوني خلي نفضها وديا وشتريد اني حاضر, بس لا مركز شرطه وفضايح
رجل الامن: انت خوش ولد ولذلك اساعدك, تريد تفلت وحدك؟ بورقه!! انت وياها؟ ورقه ونص!! شكلت؟؟
اللوتي: ورقه!! مو هوايه؟؟ بس مو مشكله المهم اخلص من هل مصيبه
لطيفه: لا ياجبان, انطيي بعد نص ورقه وخلي نولي سوه, عود كلشي ما اخذ منك!!
اللوتي: اوكي بس انجبي ولاتفتحين حلكج بعد
رجل الامن: (بعد ان قبض المعلوم), اوكف لحظه خلي اكلم مسؤول السيطره
عاد رجل الامن بعد نصف دقيقه
رجل الامن: لطيفه انزلي المسؤول ماوافق يهدج, وخابر المركز يريدون يسألوج كم سؤال, وانت ولي منا بسرعه
لطيفه: هاي شلون مصيبه (للوتي) كله من وجهك الفكر, منين الله جابك عليه اليوم طيح الله حظك, عبالي سبع!! طلعت دجاجه يل اثول
اللوتي: انجبي, يمعود مو انطيتك نص ورقه على مودها, شلون هسه رجعلياها؟؟
رجل الامن: بعد دقيقتين توصل سيارة الشرطه اذا بقيت لحظه وحده والقران ادزك وياها, اشللللللع
بعد أن هرب اللوتي بجلده
لطيفه: ناوشني النص ورقه مالتي
رجل الامن: هاج الزمي الف عافيه عليج, هذا خامس واحد اليوم!! كافي تعالي باجر…..

سرمد علي الجراح (مفكر حر)؟

About سرمد علي الجراح

كاتب ليبرالي
This entry was posted in الأدب والفن. Bookmark the permalink.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.