مؤتمر القاهرة للمتآمرين المأمورين من فروع المخابرات السورية

بيضحكوني عنجد اصحاب العقول اللي ما زالت عالقة بربيع ٢٠١١ و ما تقدمت خطوة وحدة لقدّام..
خلص مؤتمر القاهرة ، و طلع المؤتمرين المتآمرين المأمورين من قاعات الاجتماع ، و بوجهون الى شاشات التلفزيون لتسويق ما جرى بحثو في زواريب المؤتمر المليئة بالوفود الممثلة لكل فروع المخابرات السورية ..
عشر بنود الله وكيلكون ، لا واحد و لا اتنين ..
عشر توصيات ، كل توصية بدها لتتنفذ قرار خص نص من مجلس الامن و تحت الفصل السابع ، بس الشباب كانوا مقتنعين انهون قادرين على تنفيذو..
– طالبو اولاً و من كل عقلهون بإطلاق سراح المعتقلين و المخطوفين..
هل عندكون اسماءهون؟؟
هل عندكون أماكن احتجازهون؟؟
هل عندكون اسماء الجهات اللي خاطفتهون؟؟
و لك انتو نشفت زلاعيمكم و انتو اتطالبو بإطلاق سراح شريككم عبد العزيز الخيّر وما عم تمونوا على شي بو حيدر ليخبركون وينو ، ماشالله صار بدكون كل المعتقلين هلأ !!!!!!!
– طالبو باتخاذ كل الإجراءات للحفاظ على وحدة سوريا و هنن متناسين تماماً انفصام شخصية المدن اللي عايشة تحت سقف النظام ، و متجاهلين وجع اهل اللادقية و تفكك نسيجها الاجتماعي اللي بعمرو ما ممكن يتعالج.. وحدة مين و الناس نايمين يا ايها المصابين بالتوّحد ؟؟؟
– كما و طالب المؤتمرين المتآمرين المأمورين بالانتقال الى الديمقراطية على قاعدة جنيف..
حلو.. قاعدة جنيف حلوة و بنت عالم ، بس عن أي نسخة عم تحكوا ؟؟؟ نسخة جنيف الروسية او الأميركية ؟؟؟ لانو بتفرق معي ، وبتفرق معي كتير..
– وطالبوا الشباب بعد أكلة كشري على إنهاء الوجود المسلح لكل الفصائل الأجنبية ..
بشرفي هيدي احلى توصية.. مين فيكون بيمون على قاسم سليماني او على حسن نصرالله ؟؟؟ مين فيكون بيعرف يوصل للبغدادي او الجولاني او عندو رقم تلفون قائد اصغر كتيبة بأصغر ضيعة بأصغر مدينة بسوريا ؟؟؟
– و تبقى التوصية الأهم للمتأمرين هيّة ببذل كل الجهود لإعطاء الاولوية لمكافحة الارهاب ..
لا تفهمونا غلط يا جماعة ؟؟؟
الاولوية مو لاسقاط النظام !!
الاولوية مو لاستعادة الكرامة للشعب السوري!!
الاولوية مو للعدالة المفقودة!!
الاولوية مو لإنهاء التسلّط العلوي على مفاصل الدولة!!
الاولوية مو للحرية و الديمقراطية و هالاكل الهوا!!
بدكون يا أخي تعملو ثورة ضد الارهاب هاد حقكون، بس لا تواخزونا نحنا سبقناكون و طلعنا ثورة لاستعادة سوريا من الحرامية و المجرمين ، خلونا نخلّص ثورة الحرية بالاول اللي ما شاركتوا فيها ، و بوعدكون وقتها انو ما رح تحتاجوا لأي ثورة من بعدها و خصوصاً ثورة مكافحة الارهاب لسببين :
الاول انو الاسد راعي الارهاب رح يكون مشي ..
و الثاني انو أدوات الاسد مكافحين الارهاب رح ينتهوا بانتهاء سبب وجودهون ..
و بالنهاية وبالنسبة لمطالباتكون و توصياتكون :
من أنتم ؟؟؟؟؟؟؟؟؟