ليموت يا ابني اللي بيعرفني

ح اطلع برّا صندوق الاتهامات المعلّب للأقليّات في سوريا، و حط إصبعي للمرّة الاولى من تلات سنين على الجرح الحقيقي و على المتهّم الاول بدعم نظام الاسد المجرم..
حكينا كتير عن تورّط الأقليات في صراع الاسد مع الشعب السوري في معركة الحفاظ على كرسي السلطة، و دخلنا في نقاشات بيزنطية عن دور العلوي و المسيحي في الحرب القائمة على الاكترية العددية السنيّة في سوريا..
بس اليوم خلّونا نحكي و بصراحة عن دور أقذر أقلية في سوريا واقفة مع بشار الاسد..
الأقلية السنيّة الأسدية..
من هم؟؟
هم اصحاب المصالح الضيّقة اللي اعتمد عليها النظام الأسدي لتمرير فكرة علمانية الدولة.. هم اصحاب رؤوس الأموال المكتسبة و المستباحة من عزوم شباب سوريا و اللي اكتسبوها نتيجة قوانين جائرة ساعدتهون على السيطرة على لقمة العيش من جهة، و تغيير الوجه الاجتماعي الحقيقي في سوريا من جهة تانية بما يخدم مصلحة استمرار النظام..
في حجتهون بيقولولك : كانت مصالحنا شغّالة ، و أمورنا بخير ، لولا اجت ثورة النحس و خسرنا كلشي بنيناه..
يا ابن جلدتي اللي ما بفتخر فيك..
انت ما خسرت شي بالحقيقة، كل خسارتك كانت من الأموال و المشاريع اللي من الأساس كسبتها بالباطل.. انظر الى نفسك قبل مراسيم السنّة الاقتصادية كالمرسوم رقم عشرة و غيرو!!! و اتذكّر وين كنت قبلها؟؟؟ و اذا ذاكرتك ضعيفة او ما حابب تتذكر انا بخبرك ، كنت ولا شي … و لا شي ..
اتطلّع ايها الأحمق كيف المسيحي بيوقف مع اخوه المسيحي على الصح و الخطأ ، و شوف كيف بيدافع عن وجودو،و كيف راح لآخر الطريق في معركة بقاؤو، و انا بحييه لغيرتو على ابناء طائفتو..
شوف العلوي اللي حواليك، شوف كيف مستعد يآمن انو السما حمرا، و الشمس بتشرق من الغرب في لقاء بقاء السلطة في حنايا الطائفة.. و بدوري بارفعلو القبعة لخوفو على بقاء و استمرار ولادو..
شو عم تعمل انت لولاد طائفتك؟؟؟
انا رح قلّك يا قليل الأخلاق و الضمير، لانّك اضعف من انك اتجاوبني..
منشان رزقك عم تصفّق لقاتل ابن عمك..
منشان مصالحك عم تهتف لسالخ جلد ابن حارتك..
منشان مشاريعك الرخيصة متلك عم تحيي جلّاد ابن بنايتك..
منشان متعة روحة بحر، او سخف طلعة جبل بالصيف مستكتر الحياة لطالبين الحياة..
بعنصرية غريبة بتتطلّع على من ثار في سوريا.. شوية رعاع و انت الرعاع ، شوية حثالة و انت الحثالة، شوية قرباط و انت و كل عائلتك قرباط..
ما عم طالبك اتصير مع الثورة ، فالثورة ما بتقبل أنصاف بل أرباع الرجال متلك، و لا بتنصهر مع قليلين الأخلاق بل بتلفظهون..
المسيحي بيقلّك بمعرض دفاعو انّو خايف على مستقبلو ، و العلوي بيستعرض ماضي مزّيف بيبني عليه هواجسو من القادم ، بس انت على شو خايف؟؟
او قلّك انت مو خايف من شي، انت و غيرك خايفين من الثورة لانها رح اترجعكون على أماكنكون الحقيقية..
الله يرحم اصحاب الأمثال : قلّو الابن لأبوه ، يا ابي شرّفني، بيجاوب الأب : ليموت يا ابني اللي بيعرفني..
بدّك تنطر يا ابن الساقط ليموت ١٨ مليون سنّي بيعرفوا ابوك قبل ما يقدر يشّرفك، بينما لو قلت من تلات سنين ” حرية و بس ” كنت انت اللي شرّفت عيلتك كلها..
الله يطعمكون الشرف..