سوريون في رحلة الموت
بيقولو الوطن اولاً..
و شو قيمة الوطن بلا مواطن؟؟
شو قيمة بحرك يا لاذقية اذا صار حكر عالأغنياء، و شو قيمة اسوارك يا شام اذا صارت لتحمي لصوصها..
و شو قيمة قلعتك يا حلب و اسواقك اذا صارو ثكنات عسكرية ..
و شو قيمة شجرك يا أدلب اذا صارت فحم للاراكيل..
و شو قيمة مسارحك يا درعا اذا صارت منصاتها لحفلات علي الديك..
و شو قيمة جبالك يا سويدا اذا ما فينا نزورها..
و شو قيمة ترابك يا حمص اذا صارت لدفن النفايات..
و شو قيمة نفطك يا دير اذا صار لشراء قصور الحرامية..
و شو قيمة تنوّعك يا قامشلو اذا اكرادك بلا هوية..
و شو قيمة جبالك يا طرطوس اذا صارت مأوى للحرامية و للمهربين..
و شو قيمة نواعيرك يا حماة اذا عاصيكي ما بينشرب..
و شو قيمة تاريخك يا رقة ، اذا أعادوا اهلك لما قبل التاريخ..
معنى الوطن اجا من كلمة مواطن، متل ما اجا اسم سوريا من أصل سكانها السوريين..
ليكن المواطن همنا، و اتركوا بناء الأوطان عليهون ..
