لمن مازال عم يسأل ، ليش قامت الثورة ، كنّا بألف خير

لمن مازال عم يسأل ، ليش قامت الثورة ، كنّا بألف خير..
هذا ما يحصل في سوريا الاسد..
– اتصّلت مديرة مدرستي بالوالدة و انا بالصف الخامس ،عم تطلب منها ما بقا تبعت معي موزة عالمدرسة منشان مشاعر ولاد صفّي..
– سفرة شهرية على طرابلس لشراء علبة سمنة و كيلو قهوة..
– الشريف درويش، و الحرامي شاطر حلال عليه..
– يوم عطلة الجمعة عند الناس مناسبة لتوفير المواصلات..
– المشايخ و المطارنة مساعدين بفرع امن الدولة..
– البحر اتبلّط و خشب الغابة صار فحم اركيلة ..
– راحت ايام عبد الحليم العندليب ، و اجت ايام الديوكة..
– صار للمصالحة الوطنية وزارة..
– الحرية شعار للأمة ، مشروط بالوحدة و سبيل للاشتراكية ، و حلّوها اذا فيكون..
– امة عربية واحدة من طهران للضاحية..
– الماغوط قرر يخون وطنو بعد ما شاف أمثال غوار صارو الوطن..
– شعار التلفزيون العربي السوري ، تعس..
– منقرا الجرايد الدولية بعد تلات ايام من صدورها..
– العلم و الشوارع و الأرصفة تعتبر مكرمة من الرئيس ..
– حلّك يا الله حلّك، يقعد حافظ محلّك..
– الضابط بتكبر ثروتو طردياً مع ارتفاع رتبتو، و بتتناسب عكسياً بحسب طائفتو..
– ارتفعت على قمة جبل قاسيون لوحة ” منحبك “..
– اتسمّت اسماء المطارات كلها بأسماء عائلة الاسد ، الا مطار الضبعة فتركوه بهالاسم تيمنّاً بالسيدة ناعسة ، مو لسواد عيوننا..
– ممنوع اتبيع دخان تهريب، بس مسموح تهريبوا..
– انتقلت العاصمة السياسية الى جبلة، و الاقتصادية الى القرداحة..
– قام الشعب السوري وانتقض منشان سندويشة كباب و خمسمية ليرة ..
– اذا بدّك تتجوّز بيلزمك موافقة أمنية من تلات فروع عالاقل..
– صور حافظ الاسد و ابناؤو بالمساجد و الكنائس ..
– فاتورة الهاتف الأرضي تعادل نص راتب موظف درجة أولى ..
– القمح بيتخزّن بالصوامع خمس سنين كمخزون احتياطي، و الشعب بيوقف ساعة على طابور الفرن ليحصل عالرغيف..
– اكتر من ستين بالميّة من الاقتصاد السوري بيد رامي مخلوف..
– أكتر من اربعين بالميّة من السكان تحت خط الفقر..
– اكتر من ٢٠٠ مليار دولار حجم استثمار المستثمرين السوريين خارج سوريا و الممنوعين من العمل و الاستثمار في سوريا..
– اكتر من ٣٠٠ موقع أثري، و مع ذلك سوريا مانها موجودة بالخريطة السياحية..
– بيخلق الولد طليعي، بيترعرع شبيبي، بيكبر عضو عامل، و بيموت ما بحياتو حضران اجتماع لحزب البعث..
– البلد في المرتبة ١٤٣ على لائحة الدول الأكثر فساداً بالعالم..
– كل مواطن مدان حتى يثبت العكس..
– سوريا و جزر القمر و السودان و الصومال و لبنان، الدول الوحيدة العربية اللي ما تأهلت على كاس العالم بالفوتبول، مع العلم انو شافو في الرياضة حياة..
– عنصر أمن مخصص لكل تلات مواطنين ..
– امتلاك سيارة عبارة عن حلم، و شراء بيت بيكلفك غربة عشرين سنة..
– طلعة غدا على مطعم مع العيلة بيلزملها تحضير تلات شهور..
– متوسط دخل الموظف ستين دولار بالشهر، بالوقت اللي ثروة بشار لحالو اكتر من تلاتين مليار دولار.
– الشباب اللي بدهون ينتسبوا للجان مكافحة الفساد، بيدفعوا رشاوي ليكونوا جزء منها.
– دخلت السجن بدعوى رشوة ضابط بالجيش، و خرجت منّو برشوة للقاضي..
في سوريا الاسد ..
– رئيس معتوه حكم البلد ١١ سنة و هوّة مقتنع انو اهم إنجاز عملو بكل هالسنين انو نزل مع مرتو أكل بين الناس بوظة بساحة عرنوس..