متل كل اطفال سوريا.. كان يفيق هالطفل بشار صباح العيد على طرطقة أبوه و هوّة عم يتدرّب على صلاة العيد ، كم سجدة و كم ركعة و كم تكبيرة ، تحضيراً قبل خروجو مع شكيلاتو الى مسجد بني أمية الكبير لأداء الصلاة ، و حط الشلحة لاحقاً على كتف المنافق اللي أقام الصلاة ، و كيفية الوقوف لمصافحة كركوزات النظام و معايدتهم ، و تسلّم قصاصات الأوراق اللي فيها المطالب ، و التأكد قبل الخروج من انّو جرابات الزعيم مو مبخوشين ..
يرجع ابو الطفل بشار بعد ما أنهى تنفيذ العبء الأمني السنوي اللي بيشغل فيه كل موظفين الدولة ، و بيبدا يتحضّر لاستقبال العائلة لتقديم واجب المعايدة..
باسل حبيب الماما مع اخوه ماهر ماسكين مسدسات البلاستيك و جامعين موظفين القصر عم يلعبوا معهون عسكر و أخونجية ..
بشرى حبيبة البابا جايبة رفيقها آصف عم يتلاعبوا و يتناغشوا عروس و عريس..
مجد اجدب العيلة قاعد عزاوية أوضة القعدة عم ياكول مخطتو..
امّا حبيب الملايين بشار كان من بعيد قاعد و عم يراقب الكل و يتعلّم..
عم يتسمّع على عمّو رفعت و هوّة عم يحكيلو للبابا كيف نفّذ مجزرة تدمر..
عاطي أدنو لعمّو جميل و هوّة عم يتناقش مع ابو ذو الهمة شاليش عن تهريبة السلاح الاخيرة لبيروت..
لفتلو نظرو خالو محمد عم يحكي عالتلفون بلغة غريبة ، ما قدر يحفظ منها الا كلمة شالوم بهداك اليوم..
برم راسو لعند خالتو ام عاطف ، شافها عم تحكيلها لأم أنور عن حمل الدخان اللي طلع مبارح من طرابلس..
لف بشار على كل عيلتو ، و لملم عيديتو ، و حطها كلها ببرميل كبير كان عاملو طامورة ..
برميل حط فيه كل المصاري اللي لمها ، و عبّاه بكل الإجرام اللي اتربّى عليه ، و زيّنو بكل احقاد الارض اللي ورثها من عيلتو ، و سمّنوا و كبّروا لوقت ما اجا زمن فتحوا..
اجا العيد سنة ٢٠١١ ، و قبل ما يعمل متل ما علمّو أبوه من تلاتين سنة ، و قبل ما يتأكد انو كلساتو مو مبخوشين ، رمى طامورتو عيدية على راس اطفال سوريا..
مواضيع ذات صلة: فيديو بشار الأسد يؤدي صلاة عيد الفطر السنة النبوية الصحيحة جامع الحمد 17/7/2015
