خلصت حلقات مسلسل ضيعة ام الطنافس الضايعة، بعد ما طمر شبيحة ضيعة التخريمة نفايات كيماوية بأرضها ، و تركنا المخرج الليث حجو نغوص بالاستنتاجات عن مصير ولاد هالضيعة..
و كما هو الحال في كل المجازر التي تحصل ، هناك ناجٍ وحيد، المختار البيسة..
زهير رمضان اللي حقق حلموا بعد المجزرة و هاجر الى ضيعة التخريمة الفوقا، و صار عندو مكتب و اربع حيطان و سكرتيرة و ختم دائري بيوّزع فيه شهادات الوطنية على عبيد ابو شملة، و ختم بيطجّوا بالخيانة على صفحة كل مين أصر على اتهام ابو شملة بمحو هالضيعة… الوديعة بسمومهون و نفاياتهون..
زهير رمضان اللي خوّن جمال و مكسيم و فارس و عبد الحكيم و يارا و مازن و غيرهون ، و مبارح طرد من المزرعة حاتم و سمر و الباقي من ضحايا ابو شملة ، و شاف انو التمادي بوصف ولاد ضيعتو بالإجرام و سفك الدم السوري رح يزكّي أسموا عند اللي فوق، و رح يعزّز من موقعوا التشبيحي الجديد..
باسمي و بأسم كل مين استشهد او هرب او لجأ او انطرد من ام الطنافس، بحب قلّك يا مختار انّو تراب الضيعة رح ينضف و يرجعوا الها ولادها مهما طال الزمن او قصر، و رح ترجع عفوفة على شباكها تتمعشق مع سلنغو، و رح يرجع الختيار على دكانتو ليبيع قضامة و بزر شمس ..
اما اهل التخريمة اللي لجأتلهون و نسيت ولاد بلدك اللي ماتوا و اتهجروا بسببها، رح تكون في مزابل التاريخ ، او قصة رعب رح نحكيها لولادنا يوم اللي بدنا نخوفهون من البعبع..
و من لسانك يا بيسة رح انهي ردّي عليك: لعما بعيون عيونك ، خير ما فيك، دخّانك بيعمي..
