من فاته حضور مسلسلات رمضان في النصف الاول من الشهر ، ما كتير يزعل لانو ما راح منّو شي كتير..
باتفيق الزوجة على رنّة موبايل صاحبها، بيتفقوا على موعد عالغدا ، بالوقت اللي بيكون الزوج عم ياخود دوش و يحكي مع مرة صاحب مرتو عالواتس اب ليتفق معها على موعد بعد الشغل على العشا..
تاني حلقة بيفيق الزوج و من على تختو بيحكي مع صاحبتو ليشوفها بالسينما، بالوقت اللي بتكون الزوجة عم تحضّر كاسة نسكافية ، و عم تفكّر بالليلة اللي قضتها مع زوج صاحبة زوجها..
و هكذا..
دراما واقعية مستوحاة من قصة حقيقية لأشخاص اعتباريين..
بيقلها عندي اجتماع مغلق مهم، بيكون عم يحكي عالسكايب مع شهرزاد و يستعرض فحولتو..
بتجيها من الله لأسماء ، بتتركوا باجتماعو المغلق و بتروح على غرفتها لتمارس مياعتها و هيّة عم تتساير مع عشيقها عزمي عالخط الساخن..
انيسة لايفة على ابو سليم دعبول..
و ابو سليم حاطط عينو على ام عاطف..
و ام عاطف ما شايلتو من أرضو لابو سليم و عينها على وليد المعلم اللي قاضي كل يومو حايم على بثينة، و بثينة عينها على بشرى ، بس بشرى متزوجة من أصف ، فراحت بثينة فجّرت مبنى الأمن القومي ليموت أصف و تختلي ببشرى، بشرى شرّت مخطتها على زوجها، و هربت من السرايا بعد ماعملت نزوة مع ذو الهمة شاليش، بس ذو الهمة حالف يمين الا يجيبها للونا الشبل ، بس المشكلة انو لونا مع اقل من رتبة رئيس ما بتعمل علاقة، و الرئيس ما فاضيلها للونا لانو ملتهي عالسكايب بشهرزاد و عالفايبر بهديل ..
لونا كبرت براسها، و قررت تنهيها لشهرزاد ، فراحت لحتى اتطقها برغي عند اسماء، بس اسماء كانت ملهية باجتماع مغلق مع ماهر..
فقررت تشكيهون هنن الجوز لبشار، فشافتو بخلوة مع ميادة الحناوي..
ميادة اللي كانت صاحبة الاب بالزمانات،و ورثها الابن من جملة ما ورث عن ابوه..
اجا الليل..
و خلصت المغامرات العاطفية لركّاب سرايا حافظ، و اجتمعو الكل على طاولة عشا واحدة لخيانة سيدة واحدة ، سيدة السيدات سوريا..
