مبارح و في حفل رسمي صارخ تم التحضير الو لمدة شهر في حمص المحتلة تكريماً لذوي الشهداء ممن دفعوا دماءهم فداءً لآل الجحش..
اجو الأهالي، قاطعين كل المعوقات و الحواجز، و متكلفين عناء السفر ، حاملين معهون صور شهداءهون باليمين، و صورة القائد باليسار ، و لافّين علم الوطن حبل مشنقة على رقابهم..
بعد الكلمات المؤثرة، و احاديث عن بطولة بو حيدر في بانياس و ملاحم بو علي في جوبر، اجا وقت توزيع الهدايا التذكارية..…
اليد اليمين اللي اجت حاملة صورة الشهيد، رجعت حاملة كيلويين رز قصير..
و اليد اليسار اللي دخلت الحفل حاملة صورة الرئيس الشاب رجعت حاملة كيلويين برغل اسمر..
في السنة الأولى كانت تنقل جنازات ولادكون على التلفزيون و تاخدو بيوت تمن لدماءهون..
في السنة التانية توقّف نقل الجنازات على الهواء مباشرة و صارت القيادة الحكيمة تعوّضكون بخطوط موبايل مجانية مع خدمة رنّة ببلاش بصوت القائد الخالد..
في السنة التالتة صار دم ولادكون بعنزة جربانة ما بتشرب الا من راس النبعة..
و مع دخول السنة الرابعة صارت قيمة جثث ولادكون اللي من دون رؤوس بكيلو رز و كيلو برغل..
و بوعدكون مع السنة الخامسة، رح تقتصر منح القائد على حبوب فياغرا و باقة جرجير لتجيبوا ولاد و تبعتوهون يفطسوا فدا صباطو..
