لا تنتخبوني يستر عرضكون ، و الله بروح فيها

و كما هي العادة في الانتخابات الديمقراطية ، يسعى كل مرشّح لتقديم برنامجو الانتخابي لنيل اكبر عدد من الأصوات ..

و مساهمة منّي في هازا العرس الديمقراطي ، عملت مناظرة بين اكثر المرشحين حظوظاً للوصول الى سدّة الحكم..
على يميني المرشّح بشار الاسد..
و على يساري المرشّح ماهر الحجّار..

١- ما هو موقفكون من الثورة السورية؟؟
– بشار: انّ ثورة الثامن من آذار المجيدة هي اهم شي صار في تاريخ سوريا الحديث، و فيكون تتخيّلو لولاها شو كان صار فيني او بعيلتي اليوم ، يعني بالزايد بكون معاون شوفير سرفيس على خط جبلة ، و ماهر يا دوب عندو بسطة دخّان على مفرق الفاخورة ، و امّي عم تقمقش شويّة حطب ، و بو باسل حارس بالريجي بنص دوام..
– ماهر : شاركت بالأيام الاولى من هالثورة بالمظاهرات السلمية ، وبعدين عطيت اسماء كل المشاركين و صورهون للجهات المختصة بغية اعادة تأهيلهون..

٢- سؤالي كان عن ثورة الحرية ٢٠١١ !!!
– بشار : ولك خلصت خلصت من زمان ، أبينحكى فيها يا زلمي ، كلهون كانوا كم مليون كلب و خلصنا منهن..
– ماهر : الله لا يوفقوا لحمد ، كنا نطلع الساعة تلاتة بعد نص ليل لنقضي حاجتنا بالشوارع لانو المي مقطوعة بالبيوت ، هلأ عم نعملها تحتنا..

٣- ماذا تعني لك الحرية ؟؟
– بشار : الحرية الحرية الحرية !!! و الله سمعان بهالكلمة ، طيب ممكن تعطيني احتمالات !!!!
– ماهر : الحرية نادي عريق في حلب، اشتهر بالفوتبول و كرة السلة ، و كان منافس شديد لفريق الاتحاد..

٤- طيب بلاها الحرية، شو بيعنيلك مفهوم الكرامة؟؟
– بشار : شو صايرلك ولك صوفي ، اتفقنا تكون المناظرة بالعربي ، ليش عم تستخدم مصطلحات اجنبية ، و عم تسألني عن مفاهيم غربية لا تعني الشعب السوري بشي..
– ماهر : ما بعرف شي عن الكرامة ، بس اذا بيهمّك فيني احكيلك عن الذل للصبح ..

٥- ما هو مفهوم الشهيد ؟؟
– بشار : هو كل شخص في الثلاثين من العمر ، إلو دقن و عم يسوق مرسيدس و قلبت فيه عطريق المطار ومات ، فهو شهيد..
– ماهر : الشهيد هو كل انسان جحش تجرّأ انو يرشّح حالو لانتخابات الرئاسة في سوريا لمواجهة الاسد..

٦- ماذا عن المقاومة ؟؟
– بشار : هون ملعبي بقا.. قاعد ولك صوفي من الصبح عم اتضيّع وقت العالم بالحرية و الكرامة و الثورة و هالشغلات التافهة ، و لك احكي بشغلة انا بفهم فيها .. المقاومة هيّة انو تكون جاهز دائماً لصد مؤامرات الحرية و الكرامة على بلدك بغية تحرير الجولان ..
– ماهر : انا زلمة ماني لا علوي و لا شيعي لحتى افهم بالمقاومة ، ما بعرف شي عنها ، و بفضّل ما احكي بشغلة مو من اختصاصي ..

٧- المرأة ؟؟
– بشار : بس استحي ولك صوفي ، انا بخجل احكي بالسكس قدّام العالم ..
– ماهر : حرصاً مني على دور المرأة في سوريا ، بانتخابي رح كون اول امرأة وصلت للرئاسة في سوريا..

٨- من هو الإرهابي ؟؟؟
– بشار : اي مسلم سنّي هو مشروع إرهابي ، و قتلو واجب قبل ما يتكاثر ..
– ماهر : الإرهابي هوّة كل واحد بيقول عكس ما بيقول منافسي الاسد ..

٩- كلمة اخيرة للشعب السوري ؟
– بشار : ما عندي كلمة اخيرة ، انا زلمة باقي للأبد و كلامي ما الو نهاية ، فهمان؟؟؟
– ماهر : لا تنتخبوني يستر عرضكون ، و الله بروح فيها ..

١٠- شو رأيك بمنافسك ؟؟
– بشار : شو هالجحش هادا؟؟
– ماهر : غير تلاتة ما منختار ، الله و سوريا و بشار ..